Verbrauchertelegramm Europa-Ausgabe Forá 2025

Beilage zur ladinischen Europa-Ausgabe Nr. 14 - Redaktion: Europäisches Verbraucherzentrum

E-COMMERCE

I svantaji dl "Buy Now, Pay Later"

La modalité de paiamënt "Buy Now, Pay Later" (BNPL) conzed da cumpré atira n produt y da le paié daldô te rates, sovënz zënza fic. Porimpó comporta chësta soluziun ince val’ prighi. Le pröm é sigü chël dl suraindebitamënt: la poscibilité da sburlé le paiamënt pó condüje a spëne deplü de ci che an pois realmënter se vaghé. N secundo punt important é che an mëss mëte averda ai fic y ales tasses ascognüs: ince sce tröpes plataformes BNPL detlarëia da ne calcolé nia fic, pól gní apliché tl caje de intardiada di paiamënc de gran penales o provijiuns. I ne desson nia se desmentié che an podess avëi da nen fá cun na gestiun complicada dles rates: al é saurí da perde le control sön les tomanzes y le prigo de desmentianzes y cosć surapró vëgn majer. Tl caje de problems cun la spediziun o cun le retüda di bëgns, o sce al ess da ester defec eventuai, podess la soluziun ester plü complicada cun n intermediar terzo (la plataforma de paiamënt BNPL) danter che che cumpra y che che vënn. Deplü informauziuns é da ciafé chiló.

INDICAZIUN DI PRISC

Ofertes speziales y trasparënza

Les reduziuns mëss gní comunicades a na moda trasparënta y sciöche al alda. Na sentënza dla Curt de iustizia europeica de setëmber dl ann passé (C-330/23) stlarësc sciöche les novités portades ite dala insciödita diretiva Omnibus 2019/2161/UE mëss gní aplicades ince tl caje dles promoziuns dl comerz al menü. Na ciadëna de supermarciá todëscia â reclamisé n prisc promozional cun na reduziun dl 23% y â adoré sciöche basa de calcolaziun l'ultimo prisc dan la promoziun y nia le prisc plü bas di ultimi 30 dis. Te chël tëmp ê la marcianzia bele gnüda venüda a manco, porchël ess la porcentuala dla reduziun messü gní dada dant en relaziun al prisc plü bas por ne ester nia ingianosa. Ma dé dant le prisc plü vantajus di ultimi 30 dis sciöche informaziun surapró, sciöche al é gnü fat tl caje spezifich, ne tleca nia.

SEGURËZA DI PRODUC

Al é jü en forza le Regolamënt UE nü

Dai 13 de dezëmber incá él en forza tl'UE n Regolamënt nü 2023/988/UE sön la segurëza generala di produc. Le regolamënt vëgn apliché ai produc de consum sön le marcé europeich, independentamënter dal fat che ai vëgnes venüs online o offline, nüs o de secunda man, cunciá o recondizioná. Le regolamënt deslëria fora le conzet de “produt sigü” y stabilësc ince dovëis spezifics por i marciá online por sconé i consumadus y les consumadësses da produc prigorusc venüs tres plataformes digitales.

CAJE DL MËIS
Na consumadëssa taliana â cumpré online na cherta dla coriera che fajô n iade lunch por arjunje l'aeroport da olache ara foss spo piada ia por la vacanza.
Le de denanche ara piass ia ti êl gnü lascé alsavëi che ara ess messü tó la coriera dedô porvia dl overbooking. A chësta moda ne foss la consumadëssa nia plü stada bona da abiné le jore por tëmp y ora, porchël âra cherdé sö le sorvisc cliënc, che ti â ma dé la poscibilité da anulé la prenotaziun y se fá rete i scioldi dla cherta.
La consumadëssa ê stada sforzada da jí te aeroport cun l’auto y â messü surantó cosć surapró por paié le benzin, l’autostrada y la plaza da parché te aeroport. N iade che ara ê rovada zoruch dala vacanza âra damané che la compagnia dles corieres ti retess i scioldi, mo la domanda ê gnüda refodada. La consumadëssa é spo jüda dala ZCE Talia, che ti á ortié le caje ala ZCE Germania, olache al ê la sënta legala dla compagnia de corieres. Do l'intervënt dla ZCE, á la compagnia dles corieres ala fin azeté da ti rete altamo i cosć dl trasport alternatif (benzin y autostrada).