Verbrauchertelegramm Europa-Ausgabe Jená 2025

Beilage zur ladinischen Europa-Ausgabe Nr. 7 - Redaktion: Europäisches Verbraucherzentrum

METEDE AVERDA AL'INGIANADA!

Jënt, che ó trapolé, dá da crëie da ester la Rëi europeica dles Zentrales di Comsumadus

Chësta é na manira da ingiané nöia: malfaturs savaia da aldí pro la Rëi europeica dles Zentrales di Consumadus (ECC-Net) y contatëia sües vitimes cun l'impormetüda falza da ester bogn da abiné indô ca i scioldi che ares á n iade pordü. Chësta furbaria vëgn adorada da ingiané porsones che é bele n iade stades vitimes de ingianades finanziares che ti á fat perde scioldi. Tratan la comunicaziun ti lascia alsavëi chëstes porsones, che dá da crëie da ester rapresentantes de nosta Rëi, ales vitimes che ares sá olache al é i scioldi pordüs en ocajiun dles ingianades finanziares. En particolar ti cunteres che i scioldi é sön n cunt de na banca svizera a Londra y che ai é tanco arjigná da gní trasferis sön le cunt dla vitima. Döt ma na baujia! Liede sön la plata web dla Zentrala di Consumadus sciöche chësta ingianada funzionëia y sciöche i podëis la reconësce.

COMERZ ELETRONICH

Fake-Shops, dropshipping & co – A ci él pa da mëte averda?

I fake-shops – y plü avisa plates web che savaia da ester de dërtes botëghes online - é ti ultimi agn deventá öna dles trapolades por les consumadësses y i consumadus che vëgn dant sovënz. Chëstes plates web fej gola cun ofertes iresistibles mo che n'é spo gonot nia d'ater che na gran ingianada: le patüc cumpré ne röia nia a post, al n'é nia ci che an á comané o ciamó da peso, al é n produt fat do. Dropshipping é na pratica da vëne online olache i shops vënn produc che ai n'á magari gnanca, mo che ai comana spo da fornidus terzi (gonot da fora dl'UE) pornanche al ti röia l'ordin de na cliënta o n cliënt. Chësta manira da vëne pó comporté de gragn intardiamënc y dificoltés da eserzité üsc dërc de consumadëssa o consumadú. Deplü informaziuns ciafëise sot a.

GEOBLOCKING

La Comisciun europeica y la rëi CPC slomëna Apple

La Rëi de cooperaziun por la sconanza dles consumadësses y di consumadus (CPC) y la Comisciun europeica á ciafé fora n valgönes pratiches de geoblocking potenzialmënter proibides pro i sorvisc multimediai de Apple. Pro i sorvisc multimediai App Store, Apple Arcade, Music, iTunes Store, Books y Podcasts él da öna na pert gnü constaté che Apple Media Services á intermüses desvalies por Paisc desfarënc y tla verjiun dla app röion ma sön l'intermüsa dl Paisc olache l'account Apple é gnü registré. Canche an cumpra valch tres i Apple Media Services vára ma da paié cun metodes de paiamënt (sciöche chertes de credit/debit) relasciades tl Paisc olache al é gnü registré l'account Apple. Deache l'App Store conzed ma da cumpré ite te nosc Paisc, ne vára nia da desćiarié les aplicaziuns pitades te d'atri Paisc. Indere consumadësses y consumadus dess podëi desćiarié aplicaziuns pitades te d'atri Paisc dl'UE o dla Lerch economica europeica sce ares/ai é sön le iade te chël Paisc o se tëgn sö dailó por n certo tëmp. De plü informaziuns él da ciafé sot a.

CAJE DL MËIS

Paié les tasses de transit n'é nia dagnora scëmpl y saurí: datrai incunton dificoltés da paié pro les portines dl daz.
Na consumadëssa taliana, che ê sön le iade tla Francia, á albü na te sort de problem: no süa cherta de credit, no süa cherta de debit ne gnô azetades pro la portina dl daz. Sön le rezepis êl dé dant che ara ess albü 15 dis de tëmp por paié zënza suraprisc y al gnô fat referimënt a na plata web por fá le paiamënt. La consumadëssa orô sambëgn s'anuzé dla metoda de paiamënt online. Mo pornanche ara â dé ite le codesc dl rezepis sön la plata web, él salté fora la soma de 90,00 euro impede i 12,30 euro che foss stá debit. Sön na tara á la consumadëssa contaté le sorvisc por la clientela, mo ara n'é nia jüda da regolé la chestiun y intratan ê la soma da paié jüda sö a 120,00 euro, scebëgn che i 15 dis de tëmp por paié la tassa ne n'ê nia ciamó passá. Insciö s'á la consumadëssa adressé ala Zentrala di Consumadus europeica (ZCE) Talia che á atira tut sö contat cun la ZCE Francia. Por mirit de chësc intervënt á la consumadëssa podü paié la tassa de transit zënza degun suraprisc.