Verbrauchertelegramm Europa-Ausgabe Novëmber 2019

Beilage zur ladinischen Europa-Ausgabe Nr. 87 - Redaktion: Europäisches Verbraucherzentrum


IADI

Falimënt Thomas Cook – ci pó po fá i consumadus?

De plü consumadus é gnüs dala Zentrala consumadus europeica (ZCE) Talia, ajache sü iadi ê gnüs straicá porvia dl falimënt dles sëntes todësces y austriaches dl operadú turistich storich Thomas Cook y dles sozietés coliades impara. Che che á aposté n pachet turistich é – altamo en pert – al sigü por ci che reverda le falimënt dl operadú turistich. L'assiguraziun cuntra le falimënt dess garantí che al ti vëgnes retü ai consumadus les somes paiades, sce le sorvisc ne pó nia gní forní. Ince sce i ëis messü paié sön le post indô le hotel, podëise damané l’assiguraziun cuntra le falimënt che al se vëgnes retü la soma don jö les cubites. L'assiguraziun cuntra le falimënt vëgn aplicada ma ai pachec turistics y nia indere ales prenotaziuns individuales de jori y hotí. Independentemënter dal sorvisc de iade aposté, messess i consumadus che á paié cun cherta de credit controlé le plü debota che ara vá, sce ara vá da recuperé ci che é gnü paié dala sozieté dla cherta de credit tres na prozedöra de charge back. Liede sön le sit dla ZCE co ativé l'assiguraziun cuntra le falimënt: https://bit.ly/2lvCCiE.



JORI

Ince la compagnia slovena Adria Airways fej bancrot

Le tribunal raional de Kranj á metü a jí la prozedöra falimentara ti confrunc de Adria Airways. I passajiers pó en teoria fá avarëi sües ghiranzes tla prozedöra falimentara cina ai 3 de jená dl 2020 ortian inant na lëtra racomanada por sloven ala misciun dl tribunal raional de Kranj, don dant le numer de registraziun St 2704/2019, i dac d'identificaziun dl creditur (inom, cognom y residënza) y la soma dl credit ti confrunc de Adria Airways. Dal sit dl ofize de Roma dla ZCE pól gní desćiarié le formular por sloven (y por na sauridanza ince la traduziun por talian): https://bit.ly/30WulDh. Baldi él püces speranzes che al vëgnes retü le cost di jori straicá. La ZCE ti aconsiëia a che che á cumpré le jore cun la cherta de credit da contaté la sozieté dla cherta de credit y ativé la prozedöra de charge back por recuperé la soma paiada.


JÍ CUN L'AUTO
Montli da d’invern – olá messon pa i mëte sö?
La Zentrala di consumadus europeica (ZCE) Germania á ejaminé tl detai les desposiziuns de lege varëntes tl'Europa y á publiché na brosciüra d'öga sön so sit web. Tl'Austria por ejëmpl messon avëi i montli da d’invern dal 1° de novëmber cina ai 15 d'aurí sce al é nëi o dlacia sön les strades. Tla Francia indere n’él nia na te desposiziun, mo an mëss mëte sö les morones sce la tofla sön strada (montl blanch cun morones sön n funz bröm) le scrí dant. Sce an pó ince tó i montli da d'invern él scrit sot la tofla ”pneus neige admis” o “pneus hiver admis”. Tl Belgio, tla Grecia, tla Gran Bretagna, a Malta, tla Danimarca, tl’Irlanda o tla Polonia ne messon nia mëte sö i montli da d'invern. De plü informaziuns sön le dovëi da mëte sö i montli da d’invern ti atri paîsc dl'Europa é da ciafé sön le sit web dla ZCE Germania (por todësch o por inglesc).


CAJE DL MËIS
Al scomenciamënt de chësc isté á n consumadú olandej comané sön n sit web talian n stromënt cun tastadöra particolar, n mellotron, che al adorâ tosc por n proiet musical. Al á paié 990 euro y á aspeté val' edemes che al ti rovass adalerch. Canche al s'á intenü che al ne foss mai rové adalerch por tëmp y ora ál anulé l'ordin y á damané la retüda di scioldi. Le consumadú á aspeté ciamó val' edemes; chësc iade por che al ti gniss retü i scioldi, mo al ne ti é gnanca gnü respognü. Ala fin él jü dala ZCE di Paisc Basc che á ortié inant la pratica ala ZCE Talia. La ZCE Talia á contaté le venditur y al ti é gnü retü i scioldi.