Verbrauchertelegramm Europa-Ausgabe Jená 2020

Beilage zur ladinischen Europa-Ausgabe Nr. 7 - Redaktion: Europäisches Verbraucherzentrum


COMERZ ELETRONICH

Cai é pa üsc dërc sce i ëis cumpré les scincundes da Nadé online?

Ne á la porsona che á ciafé na scincunda cumprada online nia albü ligrëza impara? Ciarede do sce i ëis ciamó le dërt da se trá zoruch dal contrat de cumpra. En general él poscibl da se retrá te 14 dis dal momënt dla consegnaziun. La lege vëiga danfora che sce le venditur ne informëia nia coretamënter sön le dërt de retrata, se prolungia le tëmp por eserzité chësc dërt de 12 mëisc y toma insciö impormó do da 12 mëisc y 14 dis dala consegnaziun. Bun da savëi: datrai él botëghes y plataformes online che conzed tëmps de retrata majeri co chi preodüs dala lege.
Sce canche i dauris n pacl ves intenëise che al n'é nia intier, che al n'é nia ci che i ëis aposté o al ne funzionëia nia spo reclamede atira por scrit al venditur y fajede avarëi la garanzia legala.
Por de plü informaziuns ciarede do sön la plata internet dla Zentrala di Consumadus Europeica (ZCE).


INTERNET

L'Autorité Garanta dla Concorënza y dl Marcé (AGCM) sanzionëia i gesturs dla plata web copyright.it

Tl scomenciamënt dl 2019 êl sté n studënt residënt tla Talia che s'â adressé ala Zentrala di Consumadus Europeica (ZCE) Talia deache dan da ot agn âl scrit val' rimes y s'â registré sön le sit copyright.it, deache chësc pitâ n sorvisc de registraziun dles operes de proprieté inteletuala, paian 31 euro por le sorvisc. Do da ot agn á le consumadú jonn ciafé foradenia ghiranzes de paiamënt deache sciöche al pé, âl sotescrit n abonamënt dl sorvisc che se renovâ automaticamënter de ann en ann. Sön segnalaziun de chësc consumadú á l'AGCM invié ia n prozedimënt (PS11376) y á dan da püch constaté che le profescionist á deslarié fora informaziuns che ingiana sön süa identité, la sort, les carateristiches y condiziuns economiches dl'oferta reclamisada y che al arferâ la desdita dl sorvisc da pert de che che s'â scrit ite. De plü informaziuns é dan man sön le sit dla ZCE.


PACHEC TURISTICS

Thomas Cook Germania - rai de speranza por les porsones atocades dal falimënt

L'operadú turistich Thomas Cook Germania, che laurâ cun les marches Thomas Cook, Neckermann Reisen, Öger Tours, Air Marin y Bucher Reisen, â detlaré falimënt de setëmber dl 2019. Sües cliëntes y sü cliënc, che â en pert bele paié ite acunc nia da püch, n’á nia plü podü pié ia y che che ê bele sön le iade á messü gní derevers a ciasa.
En linia de prinzip prevëiga le dërt dl’UE che les consumadësses y i consumadus che prenotëia n pachet turistich é assigurá cuntra l’insolvënza dl operadú turistich. Sciode che le legisladú todësch, canche al á trasformé la diretiva dl’UE tl dërt todësch, á odü danfora la poscibilité da limité la garanzia a n import mascimal de 110 miliuns de euro, che é trö massa püch sce al vá en malora n te big player sciöche Thomas Cook.
Le govern todësch á sëgn tut la dezijiun da indenisé finanziariamënter la clientela de pachec turistics atocada dal falimënt che pó ma s’aspeté paiamënc parziai dal assiguradú.


CAJE DL MËIS
Na consumadëssa dla Republica Ceca á prenoté na crujada cun na compagnia de navigaziun taliana: n iade de trëi edemes, da Barcellona a Guadelope. Mo canche ara é sbarcada a Guadelope ára albü na burta sorpresa: so cufer che ara â metü le de denant dan la porta de süa cabina, sciöche la compagnia de navigaziun ti â porater dit da fá, ne ê nia plü da ciafé! Sön na tara á la consumadëssa contaté plü iadi l’aziënda por damané le paiamënt de n’indenisaziun, mo l’aziënda ti á ma pité 186 euro. Inultima s’á la consumadëssa adressé ala Zentrala di Consumadus Europeica dla Republica Ceca che á mené inant la reclamaziun ala ZCE Talia. Por mirit dl intervënt dla ZCE Talia á la compagnia de navigaziun odü ite che süa oferta n’ê nia adeguada y ti á insciö pité ala consumadëssa n rembursamënt de 800 euro.