Verbrauchertelegramm Europa-Ausgabe Jügn 2020

Beilage zur ladinischen Europa-Ausgabe Nr. 46 - Redaktion: Europäisches Verbraucherzentrum


IADI Y BONS

La Comisciun europeica se ghira plü liberté da chirí fora y de plü garanzies por i viagiadus

De plü Stac comëmbri dl'UE á mudé dassënn les normes europeiches por la sconanza di viagiadus y á metü sö normes nazionales che vëiga danfora l'emisciun de n bon impede na retüda ti caji che al vëgn anulé le iade.
La Comisciun europeica alza fora le dërt di vigiadus da podëi chirí fora danter retüda y bon. Por fá gní i bons plü interessanc por i consumadus messessi danterater gní assigurá te na manira adeguada cuntra insolvënzes eventuales, do süa tomada dessel gní retü automaticamënter l'import y an dess podëi i adoré a na moda flessibla cun la poscibilité da ti i dé inant a d'atri y ince por n'atra destinaziun co chëra prenotada o al messess gní dé fora bons da n import plü alt co chël paié daimpröma por descedé n majer interes pro i viagiadus.
Ince la Zentrala di Comsumadus europeica (ZCE) s’aoda che la soluziun da odëi danfora n bon impede la retüda di scioldi, adotada dan da püch ince tla Talia, vëgnes comedada da provedimënc che tëgnes cunt dles racomanaziuns dla Comisciun y dla normativa dl'UE che vel dötaurela.


PLATAFORMES DE VENÜDA

Ocio ala trapolada, ince canche an vënn valch!

Sëgn che an stá deplü a ciasa él tröc che tol l'ocajiun da romené n pü' sö y fá ordin y ciodí pa no, ince da se desgatié de n toch o l'ater, che ne vëgn nia plü adoré mo che n'é imponenia daldöt por nia, y ciara da le vëne sön na plataforma de venüda.
Mo metede averda ai trapoluns che se la roda sön les plataformes desvalies! Ne stede madër nia a ti crëie a porsones che ves contatëia y ciara da descedé osta crëta tres informaziuns y stories dër personales. Metede averda sce le cumpradú ciara da trá ite na terza porsona che pé neutrala, sciöche na banca o na dita de trasport. Ne stede nia a ti crëie a che che ves cunta dant da avëi problems da paié y se damana a os che venëis da fá n paiamënt. Ne stede mai a ti mené copies de üsc documënc d'identité a n cumpradú che podess i adoré por s'arobé osta identité y ingiané la proscima porsona che ó vëne valch.
Sön la plata internet dla ZCE podëise lí ci che al ti é sozedü a n venditur che ne se á nia tigní a chëstes regoles.


JORI

Curt de Iustizia dl'Uniun europeica: degügn cosć ascognüs canche ara se trata da fá reclam de prisc

Na sentënza europeica importanta vëgn dala Curt de Iustizia dl'Uniun europeica: les sozietés d'aviaziun mëss dé dant bele canche ares fej reclam de sü prisc sön internet la cuta söl valur ajunté che vëgn aplicada ai jori nazionai sciöche ince les tarifes por le paiamënt cun la cherta de credit. Ares mëss ince dé dant les tasses da paié por le check-in online sce al ne vëgn nia pité n' atra sort de check-in debann.


Metede averda da ne gní nia ingianá!
La signura S. ciafa n SMS che l'informëia che sü dac d'azes al'app dla cherta de credit n'é nia plü corec. Defata do vëgnera cherdada sö da n ël che savaia da ester n dependënt dla sozieté dla cherta de credit y che damana da ti dí le codesc che ara messess da n momënt al ater ciafé tres SMS. La signura S. ne s'intënn dailó nia che tl SMS él scrit che cun chësc codesc autorisëiera le paiamënt de 300 dolars. Sciöche la signura S. s'á ince cotan d'atres porsones lascé ingiané da chisc trapoluns.
Nüsc consëis: Damanede osta sozieté de cherta de credit che al ves vëgnes indô acredité chësc import tres le chargeback y blochede osta cherta sce al é debojëgn, dede dant le fat ales Forzes dl Ordin y - tl dagní - controlede dagnora ci che al é scrit ti SMS, canche i cumprëis valch che prevëiga n codesc de segurëza tres SMS y liede indortöra l'import dé dant. Inultima, ne stede mai a ti avëi crëta a valgügn che se chërda sö y fej finta da ester n dependënt de na sozieté de cherta de credit y damana do informaziuns.