Verbrauchertelegramm Europa-Ausgabe Aurí 2020

Beilage zur ladinischen Europa-Ausgabe Nr. 30 - Redaktion: Europäisches Verbraucherzentrum


SIC POR CHIRÍ N PARTNER Y AGENZIES DE MATRIMONE ONLINE

Co se stravardé da trapolades

Ince dl 2019 ti él rové ala Zentrala di Consumadus Europeica (ZCE) de plü domandes d'assistënza dai consumadus che se lasciâ sö, ajache ai â ciafé da paié de gran somes da sic por chirí n partner y agenzies de matrimone online. Sovënz ne vëgn i consumadus nia informá sciöche al toca, canche ai se scrí ite sön chisc sic, sön cai che é i sorvisc debann y cai che mëss gní paiá. Les indicaziuns sön les modalités de eserzize dl dërt de retrata é sovënz püch tleres y datrai n’éres nia danman, sciöche ince chëres sön la desdita dl abonamënt, nia saurida da ciafé o gnanca danman. Liede sön le sit dla ZCE co schivé abonamënc nia orüs a paiamënt.


BREXIT

Ci se müda pa por i consumadus?

Le Rëgn Uní ne toca nia plü pro l'UE dai 31 de jená dl 2020 incá. I sun avisa amesa la fasa de transiziun ite che dorará cina ala fin dl ann; chësc ó dí che por le momënt n'él nia mudaziuns importantes por i consumadus europeics. Por chësc ann basta ciamó la cherta d'identité por jí tl Rëgn Uní, mo bele dal 2021 podarál ester che al vais debojëgn dl passaport.
An ne sá nia ciamó ci che al sozedará cun i dërc di passajiers, les tarifes de roaming, la patent europeica y la cherta d'assiguraziun sanitaria europeica. La Zentrala Europeica di Consumadus dl Rëgn Uní laora inant cina ala fin dla transiziun. I consumadus cun retlamaziuns sura i confins fora che reverda na sozieté cun sënta tl Rëgn Uní pó contaté inant la rëi dles Zentrales di Consumadus Europeiches (ECC-Net) y porchël ince nosta zentrala.


TRAPOLADES SÖN I SOCIAL

L'ECC-Net cuntra les trapolades online

Vigni de salta i consumadus europeics sön i social network te anunzies de retlam mirades che pîta ofertes a chëres che an ne pó nia ti dí de no. I social media é mesi cun chi che ara vá da arjunje aslöm y cun faziun i consumadus y pité ofertes interessantes, mo por val' sozietés rapresentëii ocajiuns por propone abonamënc che é na trapolada, arobé scioldi o dac personai. Aladô de n stüde fat dan da püch dala Comisciun europeica é le 56% di consumadus europeics y le 58% de chi talians saltá te de te ofertes ti ultimi agn.
I dërc di consumadus s'anüza incö de na miú sconanza por mirit dl mecanism de segnalaziun estern nü surantut dan da püch dala Comisciun Europeica cun la revijiun dl regolamënt CPC (Consumer Protection Cooperation Network). La rëi dles Zentrales di Consumadus Europeiches surantol n rode fondamental sciöche interlocutur privilegé dles autorités che fej pert dl mecanism de avis.


FOCUS CORONAVIRUS

I dërc di viagiadus tl tëmp dl COVID-19

Le mëis da denant á la Zentrala di Consumadus Europeica (ZCE) Talia pité passa 1.000 consulënzes sön i dërc reconesciüs ai viagiadus che á da fá cun l'emergënza Covid-19.
Tröc consumadus n’é nia piá ia porvia dla proibiziun generala da se sposté. Tröc é ince che che pënsa da anulé les apostaziuns por les vacanzes da d’isté, fates te tëmps olache döt jo bun. Le problem n’é nia ma la malsegurëza sön l'evoluziun dla pandemia tla Talia y tl paîsc de destinaziun, mo ince le fat che che mëss sëgn sté a ciasa y tó vacanza, n’ará nia plü dis de vacanza d’isté. Che che á sëgn pordü süa fontana de davagn o n’á nia plü i medemi mesi finanziars co denat, ne podará gnanca jí en vacanza.
La ZCE á arjigné ca na lista de domandes che vëgn dant sovënz sön i dërc di viajadus tl tëmp de emergënza dl COVID-19, che gnará tresfora ajornada.