Verbrauchertelegramm Europa-Ausgabe Setëmber 2020

Beilage zur ladinischen Europa-Ausgabe Nr. 71 - Redaktion: Europäisches Verbraucherzentrum

Produc fac do

Ci che dô ester n afar é sté na ciavada

"Chiló sce ái pa fat n bun afar" se pënsa le Marco do che al s’á cumpré n per de sneakers veramënter bunmarcé en vacanza. N pez do ne sál plü ci dí canche sü bi cialzá ti vëgn confiscá dala dogana dal control sön le confin. "Ara se trata de cialzá fac do" ti vëgnel dit. Le posses de produc fac do vëgn straufé cun sanziuns nia da püch. Por so “bun afar” mëssel inultima paié diesc iadi so prisc. Sce al s'ess cumpré i cialzá originai s’essel sparagné cotan de scioldi.
Sce n produt é massa bunmarcé por ester vëi, él bonamënter valch che ne stimenëia nia. De plü informaziuns él da ciafé sön nosta plata internet sot a https://bit.ly/3h39HKk

Coronavirus

Normes de segurëza tl Paisc olache i jëis - insciö sëise dagnora ajorná!

Co fejon pa da savëi ci condiziuns d'entrada che al é te cer Paisc y cares che é les normes de segurëza da respeté? La plata internet dl Ministere di afars cun l'ester talian Viaggiaresicuri.it descrí por vigni Paisc les normes atuales sön le coronavirus y dá ince d'atres informaziuns de iade importantes. I dac vëgn tresfora ajorná.
Orëise ciamó de plü informaziuns sön i dërc di viagiadus? I les ciafëis chiló: https://bit.ly/34bsdwy.

Trapoluns de tractors

Metede averda a "massa de bones" ofertes

Tres plü gonot él da ciafé da cumpré online veicui agricoi sciöche tractors y de pices pacheres. Mo tres indô sozedel che an vëgn ingianá. Les anunzies dá atira tl edl porvia de sües bones condiziuns por le cumpradú y se desfarenziëia por chësta rajun ince da dötes les atres ofertes. Al n’é nia ma le prisc "prësc massa bun" mo al vëgn ince garantí n tëmp de proa, mené estrac dla Ciamena de comerz por alzé fora la scerieté y sovënz vëgnel cinamai impormetü che le trasport é debann y che an á le dërt da dé indô derevers la marcianzia y ciafé zoruch düc i scioldi.
Indere dui consumadus franzesc che â paié ite acunc de 11.800 euro y de 14.900 euro ne n’á indere mai ciafé sües mascins. De plü informaziuns sön co fá da reconësce i trapoluns online ciafëise sön nosta plata internet sot a https://bit.ly/2PVZTWK

Caje dl mëis
Dui sciori todësc â desdit süa vacanza te n hotel dl Südtirol ai pröms de merz porvia dla situaziun malsigüda gaujada dal coronavirus. Ai â indere bele paié n acunt de 400 euro. Aladô dla lege taliana ess le hotel podü ti fá n bon. Por mirit dla Zentrala di Consumadus Talia éra jüda da intermedié danter les döes perts ince deache le hotel s’á desmostré particolarmënter dlungia sü sciori. Inultima ti ál retü a sü dui sciori döt l’import de 400 euro.
Le coronavirus gaujëia a tröc hotí na situaziun finanziara nia saurida, mo impó él tröc che pró da ciafé na soluziun che acontentëia i consumadus.