Verbrauchertelegramm Europa-Ausgabe Auril 2018

Beilage zur ladinischen Europa-Ausgabe Nr. 30 - Redaktion: Europäisches Verbraucherzentrum


Viages

I cunsëies dl ZEC sun ulà, co y cie prenuté

L Zënter Europeich Cunsumadëures (ZEC) dla Talia pieta vel’ cunsëi ai/ala cunsumadëures che ie tl lëur de prenuté joi, albiercs, auti de mprëst y auter.
Per chi che ulëssa na cunsulënza y assistënza persunaliseda y ne se ntopa nia drë tl ciamp dl cumerz eletronich y i paiamënc cun cherta de credit/debit, iel povester miec jì da n ufize de viages. N muessa for tenì cont che n tlich scëmpl sun una dla ufiertes abinedes online tleca bele per stipulé n cuntrat de viac lient. L rezes debant ne ie normalmënter nia puscibl, y chësc unfat sce l viac ie unì prenutà te n ufize viages o tl internet.
Sibe che n prenutea n viac online che offline iel a uni moda da defrenzië danter n pachet turistich y n viac ndividuel. L viac ndividuel ie per l solit plu flessibl y miëur marcià. Per chi che à al’incontra cris ora n pachet turistich, vëij la lege danora tl cajo de falimënt o nsolvënza n valguna defendures n plu che no per l viagiadëur ndividuel. La normativa sun i pachec turistics regulea nce i dërc di cunsumadëures tl cajo de mudazions ala prestazions de viac y d’avanamënt dl priesc. Per nen savëi deplù: http://bit.ly/2pxfIpf.

Dërc di/dla cunsumadëures

Cie muderà pa tl 2018?

Tosc saral mesun se nuzé di abunamënc per i servijes streaming canche n ie per n cër tëmp te n auter stat dla UE. Oradechël uniral n generel cumbatù l geoblocking: la blocades geografiches ie na pratica de descriminazion ajache les ne lascia nia pro che i tlienc y la tleintes posse azeder a prodoc y servijes tl web y i cumpré online da n stat dla UE. N regulamënt nuef dassëssa tò y tres chësta sort de rëms. A pië via dal 1° de lugio unirà nce i cunsumadëures de duc i stac dla UE che compra n pachet turistich defendui miec.
Nfurmazions plu ala menuda sun la nuviteies dl 2018 ie da liejer: http://bit.ly/2pssvt9

E-Commerce

Plu trasparënza sun i cosć dla spedizions sëura i cunfins ora

L parlamënt europeich à apurvà n pachet nuef per l cumerz eletronich che vëij danora la criazion de na plata web tres chëla che i/la cunsumadëures y la mprejes possa cunfrunté i priejes ratei per la spedizions sëura i cunfins ora y crì ora nsci la opzion che ti cunvën l plu. Oradechël ti vëniel nsci dat ala autoriteies la puscibltà de tenì de uedl i priejes di servijes de cunseniazion che semea ora de mesura auc. L pachet messerà mo unì ejaminà dal Cunsëi di ministri dan jì n forza.

Cunsëies de viac per jëuni

“APP tl ester dla UE”

Can adrovi pa na detlarazion de mi genitores che i me à lascià jì? Ulà giapi pa sce n cajo aiut medich? Possi pa bever alcol? La ZEC tudëscia à dat ora na App debant aposta per i jëuni che pieta nfurmazions y mostra su la regules che vel’ te 15 stac dla UE. L vën oradechël nce prejentà lueges che merita de unì ududes y nunzià festivals atuei. Pervia che i jëuni y la jëunes à suvënz stënta de scioldi dà la APP nce cunsëies per co che n possa sparanië. Na checklist juda a pensé a duta la cosses mpurtantes. (http://bit.ly/2tHwFma)

Cajo dl mëns
Na cunsumadëura irlandeja ova cumprà na tascia diretamënter dala plata web de na marca taliana cunesciuda. Canche la l’à giapeda a cësa fovela mpue autramënter de coche la se l’ova nmagineda dala descrizon. Per fertuna iel per la compres online na normativa dla UE sun i dërc di cunsumadëures che vëij danora l dërt de rezes tl tëmp de 14 dis dala cunseniazion. Nosta cunsumadëura à donca damandà de pudëi rezeder se nuzan dl formuler online dla plata dl venditëur y damandan l’etichëta de retuda tres si account. Do n valgun dis che l’etichëta ne ti fova nia unida mandeda à la cunsumadëura cuntatà la firma tres e-mail tlarian si problem, ma la à mé giapà na resposta automatica: l tleca azeder al account persunel y damandé l'etichëta de retuda. Davia che la cunsumadëura ova bele fat chësc ti àla mandà mo de plu e-mails a chëles che la firma ti respundova for ala medema maniera. Ala fin àla crià n account nuef y se à damandà la benedëta etichëta. Ma te chëla ie unida ora la fregatura: l ie passà plu che 14 dis dala cunseniazion y l ne ie nia plu puscibl rezeder. Nosc Zënter ie stat bon de cuntaté la firma che se à riesc cruzià de tò de reviers la tascia tres n speditëur che ie jit diretamënter a se la tò a cësa dla cunsumadëura y la ti à pona rembursà i scioldi zënza pierder mo tëmp.
Deplù nfurmazions sun vosc dërc n cont dla compres online ie da giapé sun la plata web dla ZEC.