Iadi

“Assigurá en vacanza”

L'isté é dan üsc y i consumadus cumpëda i dis che mancia por jí en vacanza. La delujiun é grana sce an mëss dejdí tl ultim momënt ajache an röia te spitol impede sön la spona dl mer. La delujiun y dui iadi tan grana sce an mëss impó paié döt o feter döt le cost dl iade. La straicada dl'apostaziun por maratia, dantadöt sce chësc sozed püch dan la partënza, ne dá nia automaticamënter le dërt ala retüda. N'assiguraziun che cür l'anulamënt dl iade pó indere schivé altamo le dann material. Consëis d'öga y dötes les informaziuns plü importantes en materia de assiguraziuns de iade y assiguraziuns dl imprëst de auti é da ciafé tla brosciüra dla Zentrala di Consumadus Europeica (ZCE) “Assigurá en vacanza”.


Jí cun la ferata

Ci dërc án pa tl caje de intardiada o straicades?

Ince i passajiers che vá cun la ferata á dërc canche la ferata é tardia o toma fora. Sce an pó odëi danfora che an rovará a destinaziun cun passa 60 menüc de intardiada, pó le passajier renunzié al iade y damané la retüda dl cost dla cherta. Che che tol impó la dezijiun da jí cun la ferata che rovará a destinaziun tardia á le dërt da ciafé n rembursamënt minimal dl 25% dl prisc dla cherta, sce la ferata é danter 60 y 119 menüc tardia o n rembursamënt dl 50% dl prisc dla cherta, sce ara é danter 120 menüc y passa tardia.
Al momënt á i utënc dla sozieté dla ferata franzeja SNCF n valgügn problems, ajache al gnará straiché, sciöche la Zentrala di Consumadus Europeica franzeja-todëscia s'á lascé alsavëi, tröpes ferates cina ai 28 de jügn porvia de n scioper. Sön la plata internet dla SNCF vëigon düc i dis olache al sará le scioper; an pó ciaré do sce la ferata vá o manco y ciafé informaziuns sön co damané do le rembursamënt.


Sön le iade cun la ZCE

ECC-Net Travel App

ECC-Net Travel App é n proiet de düc i 30 mëmbri dla ECC-Net y ti pita a che che é sön le iade informaziuns iuridiches y pratiches y na racoiüda de frases d'öga te n'aplicaziun sora. L'app é da ciafé te 25 lingac, ara é debann y pó ince gní adorada offline .

Caje dl mëis

Por so iade a Cuba â n consumadú talian stlüt jö online n pachet d'assiguraziun de iade cun na compagnia d'assiguraziun austriaca, che messâ curí danterater dötes les prestaziuns sanitares y dl ospedal tl caje de inzidënt y maratia. Le consumadú s'á amaré tratan süa sojornanza a Cuba y á ativé l'assiguraziun. Mo al contrar de ci che al aratâ, ti á la compagnia d'assiguraziun damané da sostigní le 20% dles spëises sanitares, ajache chësc é le cost che dötes les porsones che n'é nia assigurades ince tres la previdënza soziala austriaca, sciöche le consumadú talian, mëss instësses paié. Le consumadú á spo damané la ZCE Talia da sconé sü interesc. Efetivamënter êl scrit tles clausoles desvalies dles condiziuns generales d'assiguraziun che les porsones nia assigurades dl'Austria ess messü paié instësses le 20%, ince sce le consumadú aratâ d'avëi lit avisa le contrat canche al â cumpré l'assiguraziun.
Tres la ZCE Austria él gnü arjunt ci che an aratâ ri da arjunje: la compagnia d'assiguraziun á desmostré na gran colaboraziun y á tut la dezijiun, do avëi ejaminé avisa la situaziun iuridica, che "le 20% dles spëises ne gniss te chësc caje nia paiades dal consumadú" y á lascé alsavëi che la venüda dl'assiguraziun sará plü trasparënta tl dagní. Por la ZCE é chësc n gran suzes! N consumadú contënt... y tl dagní sará les porsones assigurades informades damí!