Verbrauchertelegramm Europa-Ausgabe Mei 2018

Beilage zur ladinischen Europa-Ausgabe Nr. 39 - Redaktion: Europäisches Verbraucherzentrum

E-Commerce

Co recunësci pa na “fake shop”
Ti ultimi mënsc se à la senialazions di cunsumadëures, vitimes de nsci tlamedes fake shops multuplicà: la marcanzia apusteda y paieda danora ne vën o nianca cunsenieda o che la ie falsificheda o de stleta cualità. Pervia che te chisc caji iel belau mpuscibl giapé n rembursamënt, iel de gran mpurtanza cialé dantaprima de no tumé tla trapula!
Chëstes ie la cin carateristiches dla “fake shops”:

• I prodoc de marca vën pitei a n priesc scialdi arbassà.
• La ndicazions sun la plata web de co cuntaté la mpreja mancia defin y ie massa pueces.
• L paiamënt muessa assolutamënter unì fat danora.
• L ne vën nia tenì ite la ublianzes de nfurmazion preududes dala lege: la nfurmazions liedes al dërt de rezescion, ala garanzia legala, ala cundizions de cunseniazion y al paiamënt ne vën suvënz defin nia dates o mé te na maniera nia cumpleta, o cun tan de fai de scritura che n possa suspeté che l ie unì adurvà n program de traduzion online per les scrì.

N possa liejer truep giudizies negatifs purtei a esprescion dala utëntes/dai utënc ti forums y portai defrënc de rezenscions online.
Per n savëi deplù cialëde la plata dl Zënter europeich Cunsumadëures (ZEC).

Online trading y opzions bineres

Metëde verda ala ufiertes trapulëntes
Ultimamënter iel for plu cunsumadëures che vën dal ZEC ajache les/i se à nuzà de plates internet che pieta de fé nvestimënc cun i sparanies te opzions bineres. Suvënz nes conta la/i cunsumadëures che i conc de chësta o chëla plataforma de online trading ie te n iede unic stluc y che l ne ti vën nia acredità la somes che i à paià ite dl prim. L se trata te chisc caji de plates online trapulëntes che adrova la “drëta plates” online nen mudan l inuem. L ZEC dà n valgun cunsëies de utl per schivé de nvestì i sparanies sun de tel plates trapulëntes.

Viages

Chëurt UE: tl cajo de “scioper salver” possel unì dat la cumpensazion forfetera
L Regulamënt (CE) 261/2004 vëij danora l dërt a na cumpensazion tla forma de scioldi per i passajires de chëi che l jol se à tardivà o che ti ie unì cancelà. Na tel cumpensazion ne ti spieta nia te caji de “situazions straurdeneres” che ne possa nia unì cuntroledes dala cumpania de jol, per ejëmpl bur’ tëmp o n scioper. Tl cajo de n scioper salver da pert dl personal de TuiFly che fova unì a se l dé d’autonn dl 2016 à la Chëurt de giustizia dla UE śën stabilì che n’assënza culetiva per malatia dl personal fata te n iede ne ie nia na “situazion straurdenera”. La cumpania de jol ëssa pudù schivé la situazion pervia che la cunedida de na restruturazion aziendela possa cumpurté reazions dl personal. Deplù nfurmazions sun i dërc di passajires ie da liejer sun nosta plata web.

Cajo dl mëns
Doi cunsumadëures talians ova prenutà n jol da Bremen a Bergamo cun na cumpania de jol irlandeja. Cater dis dan la partënza preududa ie l jol de reviers unì cancelà. La cumpania de jol ne ti à nia pità ai cunsumadëures n jol auternatif – scebën che la cumpania ëssa pudù l fé aldò dla leges dla UE n forza – cossa che à sfurzà la/i cunsumadëures a prenuté nstësc n jol de reviers. Perchël à la/i cunsumadëures damandà ala cumpania de jol irlandeja l rembursamënt dl jol nuef prenutà y na cumpensazion tla forma de scioldi forfetera de 250 euro per passajir. La cumpania de jol à mé rembursà l ticket de jol cancelà. Do l ntervënt dla ZEC dla Irlanda à la/i cunsumadëuers giapà la cumpensazion forfetera de 250 euro per persona y la defrënzia danter l ticket nuef y chël bele rembursà.
Pertënder si dërc se paia!