COMERZ ELETRONICH

Consëis por che che cumpra les scincundes da Nadé online

La Zentrala di Consumadus Europeica (ZCE) á arjigné ca na ligna de consëis por les consumadësses y i consumadus che cumpra les scincundes da Nadé sön internet. Chiló él chi plü importanc: Denanco cumpré valch controlede n iade avisa la plata internet da chëra che i ëis intenziun da cumpré valch. Él na misciun dla posta dl'aziënda, na e-mail y n numer de telefon o pón pa ma arjunje l'aziënda sce an scrí fora n formular web? Vëgnel dé dant le numer de cuta söl valur ajunté (IVA)? Él da ciafé sön la plata internet les condiziuns de contrat generales cun les informaziuns sön les condiziuns de paiamënt y spediziun, le dërt de retrata y la garanzia legala? Sce la resposta ince ma a öna de chëstes domandes é NO, spo él damí mudé plata internet! Confrontede le prisc dl produt sön d'atres plates internet: sce al é cotan plü bas respet a chël che vëgn dé dant sön d'atres plates internet spo podessel ester che i ciafasses n produt fat do o gnanca chël ne. Por ci che reverda i paiamënc chiride fora n stromënt de paiamënt sigü sciöche le cherta de credit. Canche i ciafëis le patüc a ciasa controlede atira sce chël che i ëis ciafé ti corespogn bëgn a ci che i ëis comané, sce al é intier y funzionëia indortöra. Sce ara n'é nia insciö reclamede atira y por scrit. Recordesse che ince pro les cumpres da Nadé é le termin por se retrá debann da na cumpra online de 14 dis calendars dala data dla consegnaziun. Sce al se vëgn consegné la scincunda bele ai pröms de dezëmber é le termin por se retrá debann bele tomé da Nadé! Al é porchël damí damané bele danfora la porsona a chëra che i orëis ti scinché valch da Nadé ci che ara se dejidrëia y spo impormó comané la scincunda. Por de plü informaziuns consultede la plata internet dla ZCE.


IADI CUN LE FLIGHER

N pice sföi d'orientamënt dla ZCE

Por les consumadësses y i consumadus che fej n iade cun le fligher á la ZCE publiché na brosciüra olache al vëgn splighé les dificoltés che an pó incunté denanco prenoté y pié ia, ci che al é da fá tl caje de overbooking, straicada o intardiada dl jore, a ci che an dess mëte averda canche an fej le cufer y la tascia da tó tla man, co fá da reclamé sce i cufri ne röia nia a post o sce ai é gnüs danejá, cai che é i dërc di passajiers cun handicap o cun na mobilité limitada, y i.i.
La brosciüra debann é ince da ciafé sön la plata internet dla ZCE.


JÍ CUN LA FERATA

Le Parlamënt dl'UE ó renforzé i dërc di passajiers

Le Parlamënt europeich á danterater intenziun da aumenté i rembursamënc sce la ferata é tardia - al vëiga danfora n'indenisaziun dl 50% dl prisc dla cherta sce la ferata á n'ora d'intardiamënt, dl 75% por n'intardiada de n'ora y mesa y dl 100% por intardiades de plü co döes ores. Mo indere por ester bogn da reformé concretamënter i dërc di passajiers él ciamó cotan de strada da fá: sëgn él naota le Consëi dl'UE che mëss valuté. Sön la plata internet dla ZCE ciafëise dötes les informaziuns sön i dërc varënc dles porsones che fej iadi cun la ferata.


CAJE DL MËIS
Por dui agn alalungia á le pere de n jonn che vá al'université fora en Austria paié l'afit dl convit universitar da so cunt bancar talian. Mo dan da n valgügn mëisc á le consumadú ciafé na lëtra dal convit te chëra che al ê scrit che da setëmber inant ess le paiamënt messü gní fat cun n sistem de adebitaziun direta SEPA Direct Debit da n cunt bancar austriach. Le consumadú n'â nia intenziun da azeté chësta novité deache insciö ess so möt messü daurí n cunt bancar tl'Austria che ess sambëgn comporté cosć implü. Le consumadú á insciö contaté la banca austriaca dl convit che ti á splighé che al ê zënzater poscibl da d'adoré la modalité SEPA Direct Debit ince da n cunt talian. Sön na tara ál spo ciamó n iade tut sö contat cun le convit che n'un orô indere savëi nia da azeté inant i paiamënc dal cunt talian. Insciö s'ál adressé ala ZCE Talia che ti á mené inant le caje ai colegs dla ZCE Austria. Do da n valgönes edemes á le consumadú ciafé la bona noela: le convit azetëia le paiamënt ince tres le cunt talian.