Verbrauchertelegramm Europa-Ausgabe Merz 2016

Beilage zur ladinischen Europa-Ausgabe Nr. 21 - Redaktion: Europäisches Verbraucherzentrum


E-COMMERCE

Plataforma nueva ODR d’apajamënt dla stritaries

Dai 15 de fauré 2016 possa duc i cunsumadëures, che à abù problems de compra online, se nuzé dla plataforma online d’apajamënt dla stritaries (ODR) njinieda ite dala Cumiscion Europeica y azessibla dala plata internet: http://ec.europa.eu/consumers/odr/.
La Zentrela Europeica Cunsumadëures (ZEC) dla Talia ie unida numineda ufizielmënter luegia de cuntat. Perchël, sce ulëis ti sëurandé na vostra stritaria transfruntaliera a n organism ADR, ve dajerà la ZEC Talia duta l'assistënza de chëla che ëis de bujën (tel: 0471/980939, e-mail: info@euroconsumatori.org). Per deplù nfurmazions y cunsëies n chësc cont pudëis cialé la plata .


MEDIAZIUN DE PARTNER

San Valantin 2016 – Sudtirolejes che chir amor

Portai d'ancunteda online, agenzies de matrimone, chat per singles: l se trata de mprejes che uel davanië sciche duta l’autres, nce sce i “afares de cuer” y i cuntenuc de cuntrat curespundënc ie suvënz riei da definì. La consulëntes dla ZEC cëla de ti tlarì ai cunsumadëures – dantaldut canche la se trata de cuntrac cun l’agenzies de matrimone tlassiches – che l lëur dla ZEC ne ie nia chël de cunstaté che l cunsumadëur che à abù na delujion ne n’à nia abinà n partner tres l’agenzia, ma chël de verifiché sce l'agenzia ne se à povester nia tenì, defin o n pert, al’ublianzes dl cuntrat, y de se damandé te chësc cajo che l ti vënie lascià do al cunsumadëur l priesc o che la conta ti vënie nchinamei canceleda. Suvënz à la ZEC danz nce l duvier de nfurmé l consumadëur che l ne à nia respetà l cuntrat: N’ancunteda sëula, a chëla che l ne ti va nia do d’autres per mancianaza de sintonia o simpatia ie a uni moda n cuntat aldò dl cuntrat y perchël n servisc da paië al'agenzia. Da valuté autramënter dal pont d’ududa giuridich sarà l cajo te chël che l cunsumadëur giapa l cuntat de n’autra persona che ne ie perdrët nia plu tlienta dl’agenzia. Te chësc cajo ne iel per l cunsumadëur deguna ublianza de paië. De plü informaziuns é da ciafé sön nosc sit.


DËRT DI CONSUMADUS

N Porsche nuef per mé 390,00 euro?

N’azienda cun sënta ti Paejes tudësc pitëssa n servisc de mprëst d’auti per doi ani per na cuota d’iscrizion de 390,00 euro, cun assegurazion, manutenzion y barat di montli. L utënt vën metù te n sistem fat de tabeles, livei y zitlii: al fin de chësta pruzedura unissel pità la puscibltà de furné cun n auto, nce de lus y gran putënza sciche n Porsche Carrera nuef. Pra l mprëst per n tëmp curt ie l priesc de basa – che depënd dal model cris ora – de solit ntëur i 680,00-885,00 euro al dì. Pra l sistem pità dal’azienda cun sënta ti Paejes tudësc se tratel, ntant sce, de n sistem de marketing multilivel che stluj ite la puscibltà de deventé “retlutadëur” de tlienc nueves per arjonjer l resultat finel, uel dì, l mprëst dl auto cris ora. Chësta pruzedura manacia de vester tl cuntrast cun la normatives n forza. La lege 173 dl 2005, defati, vëija danora tl articul 5, che “l ie pruibì fé promozion y realisé ativiteies y strutures de venduda pra chëles che la mutivazion economica primera di cumponënc dla strutura se basa dantaldut sun l retlutamënt de sogec nueves“ o sun si capazità de vënder o ncurajé la venduda de bëns o servijes determinei diretamënter o tres d’autri cumponënc dla strutura. Per deplù nfurmazions pudëis cuntaté la plata.

Caje dl mëis

Na cunsumadëura austriaca ova apustà da n venditëur online talian n per de ciauzei al priesc de 170 euro. Sies enes do la cunseniazion àla cunstatà che la cujidura se ova giaurì, scebën che la ne ova belau mei trat sëura chi ciauzei. La consumadëura à donca mandà doi lamentanzes al venditëur, zënza ne giapé mei na resposta. Perchël iela jita dala ZEC dl’Austria che à nfurmà la ZEC de Bulsan di fac. La firma taliana à debota reagì a nosta lamentanza y à damandà che la cunsumadëura mande de reviers i ciauzei da defet. N iede che i ie ruvei tla firma ti ie la soma dl priesc paià debota unida remburseda.