Verbrauchertelegramm Europa-Ausgabe Aurí 2017

Beilage zur ladinischen Europa-Ausgabe Nr. 30 - Redaktion: Europäisches Verbraucherzentrum

Spezial comerz eletronich

Cumpré ite tl internet

La Germania é n marcé digital dër popolar nia ma por les consumadësses y i consumadus todësc, mo ince por tröc talians. Mo datrai pél propi che de plü comerzianc ne n'ois nia mené demez n produt por la Talia, che ne foss pö pordërt gnanca tan dalunc. "Ince a me m'él bele sozedü plü iadi," dij Julia Rufinatscha, consulënta legala dla Zentrala Consumadus Europeica (ZCE) Talia - ofize de Balsan, "che i ê impröma contënta da avëi abiné dër na bona oferta sön na plata internet todëscia, mo spo canche i á dé ite la Talia sciöche paisc de spediziun él gnü sö n avis che me á plütosc desplajü: 'Chësc articul ne pó nia gní mené tla Talia', o i m'á intenü che la mësa da ping-pong costâ bëgn demanco tla Germania, mo che les spëises de spediziun ê de plü co 100 euro". Ales esclujiuns de certi paisc ti dijon “geoblocking”, pro chël che al ne toca nia ma le “rerouting”, che oress dí tan co le gní mená automaticamënter sön la plata nazionala dl Paisc de residënza, mo ince la refüsa da pert dl comerziant da mené demez le patüc o pité na prestaziun te n ater Stat comëmber. Dötes les consumadësses y düc i consumadus che á bele albü da nen fá cun le geoblocking vëgn inviá a tó sö contat cun la Zentrala di Consumadus Europeica - ofize de Balsan.

Olá é pa rové le produt che i á aposté?

Regina navighëia ion te internet a chirí produc che vëgn pitá a de bogn prisc. L'ultimo iade éra stada bona da abiné n bel service dal tê y ara l'á belatira asposté. Le termin de consegnaziun ne n'ê nia dé dant avisa, mo deache al ê bele passé döes edemes á Regina metü man da se fá pinsiers y á insciö contaté la Zentrala di Consumadus Europeica de Balsan. Tla maiú pert di caji vëgn la spediziun y la consegnaziun dl patüc cumpré ite online a s'al dé zënza problems. Mo co desson pa s'astilé por se defëne da fac desplajors tratan la consegnaziun? Ci fossel pa da fá sce le patüc n’ess nia da rové adalerch o al foss danejé? De plü informaziuns de chësc vers él da ciafé tla brosciüra sön le comerz eletronich che an pó desćiarié debann sön la plata internet.

Prenotaziuns de iadi online: ofertes bunmarcé o plütosc tënores de spëises che pó ester ceres?

Comot, scëmpl, bunmarcé - insciö s'imaginëion magari che al sides canche an prenotëia les vacanzes da ciasa demez. Mo ci che an arata n bun afar pó gní roviné da cosć de elaboraziun alc y da d'atres dificoltés. La pröma "tënora" por le consumadú ti vëgn bele atira tenüda canche al stlüj jö le contrat:
le cliënt é teco bele lié ala prenotaziun, sce al clichëia sön " Kostenpflichtig buchen" ("a paiamënt dles spëises"). Tl internet bastel propi ma n clich por stlüje jö n contrat liënt dal punt d'odüda iuridich y n clich demassa pó datrai ince gní cer: na retrata debann tl tëmp de 14 dis, sciöche al é le caje canche an cumpra valch online, n'é de regola nia poscibla tl setur dl tëmp lëde y dles vacanzes. N'atra dificolté vëgn dant sce an á reclamaziuns o domandes da fá, deache al é sovënz dër ri da tó sö contat cun la portina online. Por schivé de burtes sorpreses vëgnel implü aconsié da confronté avisa i prisc y ince controlé tan che al costa da prenoté diretamënter pro le partner de contrat. De plü informaziuns él da ciafé sön nosta plata internet : www.euroconsumatori.org.

Plataforma ODR

Dai 15 de forá dl 2016 pó dötes les consumadësses y düc i consumadus che á albü problems cun na cumpra online (ince dan da chësta data) s'adressé ala plataforma online nöia d'apajamënt dles stritaries (ODR) arjignada ite dala Comisciun Europeica; chësta plataforma ti dá inant la chestiun de strit a n organism d'apajamënt extraiudizial (ADR) y la ZCE Talia pîta spo döta l'assistënza che ó ester. La Zentrala di Consumadus Talia é gnüda nominada ofizialmënter punt de contat por l'assistënza dles consumadësses y di consumadus tl caje de stritaries che vá sura i confins fora por gauja de na cumpra online.

Por de plü informaziuns y domandes él a Osta desposiziun les consulëntes dla ZCE al numer de telefon 0471/980939 o sot a info@euroconsumatori.org.