Verbrauchertelegramm Europa-Ausgabe Má 2017

Beilage zur ladinischen Europa-Ausgabe Nr. 39 - Redaktion: Europäisches Verbraucherzentrum

COMERZ ELETRONICH

La Zentrala di Consumadus Europeica (ZCE) da Balsan salva n consumadú da na ingianada de 90.000 euro.
Al é bele n pez che n jonn dl Südtirol oress se cumpré n auto eletrich esclusif y ultramodern. Te internet abinel veramënter na boniscima oferta: 89.000 euro por l'auto che al s'á tres dejidré che costass scenó cotan deplü. Le comerziant todësch á prescia y ó a vigni moda stlüje jö l'afar y porchël ti mënel al consumadú le contrat de cumpra. Denanco sotescrí indere fej le consumadú ciamó na telefonada importanta: al chërda sö la Zentrala di Consumadus Europeica (ZCE) da Balsan. Les consulëntes s'un capësc atira fora: ara se trata de n ejëmpl tipich de na ingianada online, avisa do le moto "massa bel por ester vëi". Pro chëstes sorts de ingianades vëgnel tres dant les medemes carateristiches: prisc demorvëia basc, ara ne vá nia da ti ciaré ai auti denant che i cumpré deache ai é inzai te n ater Paisc che n'é nia chël dl venditur, mesi de paiamënt nia sigüsc, de gran fai d'ortografia tla corespondënza, plates internet che é pormó gnüdes fates da püch. De plü informaziuns ciafëise sön nosta plata internet.

VACANZES Y IADI

Se jomé le fligher por gauja de codes lunges pro i controi de segurëza?
N tribunal todësch condanëia l'aeroport a ti refá le dann ai passajiers
Al sozed bëgn plü iadi che val' passajiers se dessëna canche al é na gran coda pro i controi de segurëza te aeroport y ai mëss se temëi da se jomé le fligher. Le tribunal raional (Amtsgericht) de Erding tla Germania á stabilí te na sentënza publicada da püch che l'aeroport mëss paié, sce i passajiers se jöma le jore deache ai á messü aspeté tan dî pro i controi de segurëza. Aladô dla motivaziun dl tribunal mëss l'aeroport organisé i controi de segurëza a na moda che i passajiers ais la poscibilité da arjunje le fligher adora assá. Te chësta sentënza se tratâra de na familia todëscia che â fat le check-in tl aeroport de Minca dales 12:22 y s'á jomé le jore por Istanbul dales 13:40 por gaujia dla coda d'aspeta tan lungia. L'aeroport é gnü condané a ti rembursé ala familia 613,96 euro, che é l'80% di cosć che ara á albü por mudé prenotaziun. De plü informaziuns ciafëise sot ai comunicac stampa sön nostra plata internet.

VACANZES Y IADI

Vacanzes ti Stac Unis?
Tröc consumadus nes mëna indicaziuns de n valgönes sozietés che pîta n sorvisc d'assistënza ai utënc canche ai mëss scrí fora la domanda ESTA y damana por chësc cosć cotan maius (83 $), respet ala tarifa aplicada dal Govern american. Porchël sce i ëis intenziun da jí ti Stac Unis d'America y sëis tl laur da damané l'autorisaziun, l' "Electronic System for Travel Authorization – ESTA", ves aconsiunse da s'adressé diretamënter ala plata internet ofiziala dl Govern american: esta.cbp.dhs.gov/esta che vëiga danfora n cost de 14 $ y dá de plü garanzies.

VIRE FORADECÁ

Jí a studié y a vire tla Francia
Orëise jí a vire por n pez tla Francia? Studié dailó, fá n practicum o na formaziun? Por s'arjigné ca anuzesse di consëis online dla Zentrala por la proteziun di Consumadus Europeica Germania (Zentrum für Europäischen Verbraucherschutz e. V. Germany). Le sföi d'orientamënt ne costa nia y dá na resposta a dötes les domandes dan, tratan y do la sojornanza tla Francia. La Zentrala por la proteziun di Consumadus Europeica porta pro cun chësc sföi d'orientamënt ala promoziun dla mobilité dles porsones jones sura i confins fora y les dëida tla vita da vigni de tl Paisc vijin.


Caje dl mëis
Dan da n valgügn dis sunse gnüs contatá dai colegs dla Zentrala di Consumadus dla Republica Ceca por che i ciarassun do na plata internet taliana. Na consumadëssa ceca s'â aposté n per de cialzá sön chësta plata internet, mo ara ne i â nia ciafá. Les consulëntes dla ZCE da Balsan s'á defata intenü che la plata ê n pü' sospetosa: a n valgönes seziuns importantes sön la plata internet dl'aziënda ne ti podôn gnanca pormez, sciöche por ejëmpl, ales informaziuns sön le comerziant y al sorvisc d'assistënza ala clientela. Mo da rí ê le fat che i "cookies" ê gnüs traslatá cun "lascé pro biscoc": i gesturs dla plata â bonamënter adoré n tradutur automatich por fá la traduziun y cherié la plata internet por talian. Dötes chëstes conscidraziuns ti é gnüdes menades ala Zentrala di Consumadus Europeica da Praga. Ala fin á la consumadëssa bëgn ciafé sü cialzá, nia dala Talia, mo dala Cina y ai ne ê nia originai, mo sambëgn fac do! Por schivé de te situaziuns ciafëise consëis por cumpré ite online sön nosta plata internet.