Verbrauchertelegramm Europa-Ausgabe Lugio-Agost 2017

Beilage zur ladinischen Europa-Ausgabe Nr. 55/62 - Redaktion: Europäisches Verbraucherzentrum

Imprëst de auti – consëis ütli por ti sciampé a reclamaziuns

Na gran pert dles domandes che ti röia ala Zentrala di Consumadus Europeica (ZCE) Talia – ofize de Balsan reverda l’imprëst de auti. Por evité por ejëmpl n’adebitaziuns sön la cherta de credit che ne se lascia nia splighé canche an dá indô zoruch l’auto, fossel sambëgn dërt da se informé te chësc ciamp.
Les reclamaziuns che vëgn dant gonot tl ciamp dl imprëst de auti comunicades ala ZCE de Balsan pó gní da violaziuns de contrac d’imprëst da pert dl anuzadú/dla anuzadëssa, sciöche i chilometri fac al de o la retüda dl auto danejé.
Por plü informaziuns, consëis y informaziuns sön co arjunje n’acordanza do na reclamaziun sura i confins fora, podëise ciaré sön la plata internet dla ZCE de Balsan.

COMERZ ELETRONICH

3,5 miliuns de porsones sura döta l’Europa é tomá ite te abonamënc tënora.
Al vëgn stimé che 3,5 miliuns de porsones tl’Eeuropa ais sotescrit abonamënc tënora ti ultimi trëi agn. Chisc abonamënc tënora pita ofertes de produc o sorvisc che porta i anuzadus y les anuzadësses a sotescrí abonamënc dër cers. Normalmënter mëss i cosumadus y les consumadësses paié cun cherta de debit, credit o cun fatura por podëi s’anuzé dl’oferta. Cun le jí en forza dla diretiva sön i dërc di cosumadus y dles consumadësses ai 13 de jügn dl 2014, él jü dassënn zoruch le numer de cosumadus y consumadësses talians che s’adressëia ala Zentrala di Consumadus Europeica por caji de abonamënc tënora. Plü informaziuns ciafaëise sot la seziun news sön nosta plata www.euroconsumatori.org

VACANZES Y IADI
COMUNICAZIUN

Dai 15 de jügn toma demez i cosć por le roaming
Dai 15 de jügn dl 2017 vál en forza “Roam like at Home”: pian ia da chësc de sarál poscibl da s’anuzé dl’oferta nazionala che stlüj ite menüc, SMS y trafich dac ti paisc dl’Uniun Europeica zënza messëi paié i cosć surapró. Foradecá ne vá la rëi telefonica dl’operadú dl anuzadú/dl’anuzadëssa nia plü, porchël se taca ite le roaming a na rëi telefonica dl paisc forest. Por podëi adoré la rëi foresta, nascel cosć che vëgn da sëgn inant acreditá danter operadus, impede gní trac jö al cliënt o ala cliënta sot forma de cosć dl roaming.
Por plü informaziuns podëise ciaré les domandes che vëgn fates gonot, metüdes adöm dala Comisciun Europeica: http://www.euroconsumatori.org/81914d83620.html.


CAJE DL MËIS
De setëmber dl 2016 ti él gnü refodé a n consumadú talian le jore dala Talia tl Maroco, ince sce al â na cherta varënta y sce al ê rové por tëmp y ora pro le check-in, ajache al ê gnü venü deplü chertes de ciche al nen ê. Al consumadú ti él gnü pité dala sozieté di fligri dla Gran Bretagna na compensaziun sce al ess refodé le jore. Le consumadú á pié do la proposta y é gnü sposté sön n ater jore che passâ por Paris, mo al ne ti é nia gnü paié zoruch la zifra impormetüda dala sozieté.
Por chësta rajun á le consumadú contaté la Zentrala di Consumadus Europeica Talia – ofize de Balsan, che á mené inant la reclamaziun ai colegs y ales coleghes dla Zentrala di Consumadus Europeica tla Gran Bretagna, che é stá bogn da arjunje na compensaziun de 250 euro. Mo ajache la destanza dl jore venü fora ê danter i 1.500 y i 3.500 chilometri, ti spetâ al consumadú, aladô dl Regolamënt sön i dërc di passajiers y dles passajieres dl’Uniun Europeica, na retüda de 400 euro. Ala fin é i colegs y les coleghes dla ZCE dla Gran Bretagna stá bogn da arjunje la retüda de 400 euro dala sozieté di fligri che ti aspetâ al consumadú.