Verbrauchertelegramm Europa-Ausgabe Dezëmber 2017

Beilage zur ladinischen Europa-Ausgabe Nr. 94 - Redaktion: Europäisches Verbraucherzentrum

COMERZ ELETRONICH

I consumadus mëss se defëne dales trapolades online
I consumadus europeics salta tres plü sovënz te avisc insistënc y ingianusc sön le web; al é important porchël che ai ais n atejamënt plü critich ti confrunc de chëstes ofertes, a na moda da ne messëi nia paié por produc y abonamënc nia damaná. La Rëi dles Zentrales Europeiches di Consumadus (ECC-Net) á realisé n video por todësch por daidé i consumadus odëi les trapolades online. Por de plü informaziuns y assistënza debann é les consulëntes dla Zentrala Europeica di Consumadus a desposiziun al numer 0471-980939 o tres e-mail a info@euroconsumatori.org; sön le sit internet él ince a desposiziun de plü informaziuns por döt ci che reverda le comerz eletronich.

AUTO

Dovëi de echipaje da d'invern t'Europa
Marciá da Nadé ti Paisc Todësc? Vacanza sön la nëi tl'Austria o tla Francia? Ëise metü i cufri t'auto...y i montli da d'invern? En colaboraziun cun la Zentrala Europeica di Consumadus Germania informëia la Zentrala Europeica di Consumadus Talia – ofize de Balsan sön le dovëi de echipaje da d'invern tl'Europa. Por de plü informaziuns sön le dovëi da mëte sö i montli da d'invern tl'Europa pón consulté le sit internet dla ZCE Germania por inglesc.

IADI Y VACANZES

Air Berlin: Ajornamënt sön la prozedöra d'insolvënza
Al 1° de novëmber á le tribunal de Berlin-Charlottenburg daurí la prozedöra d'insolvënza dla compagnia de fligri todëscia Air Berlin. Ajache les informaziuns sön le sit internet sön la prozedöra d'insolvënza de Air Berlin é gnüdes ajornades, ressumëia la Zentrala Europeica di Consumadus Talia les informaziuns plü importantes por i consumadus sön: www.euroconsumatori.org.

COMERZ ELETRONICH

ADR y ODR: por ciafé na soluziun por les retlamaziuns online te cört tëmp y bunmarcé
Tl'Europa á n consumadú sön cin n problem lié ala cumpra de n produt o de n sorvisc. Le 66% de chëstes cumpres vëgn fates online. Dantadöt por le comerz eletronich él fondamental da ester bugn da ciafé na soluziun por les reclamaziuns online debota y bunmarcé. De chësc él gnü baié dan da püch te n'incuntada pro la Ciamena dl Comerz de Trënt.
La plataforma ODR indere é n sit web interatif arjigné ca dala Comisciun europeica por ciafé na soluziun tl caje de stritaries che nasc da cumpres online. La plataforma é debann y saurí da adoré: https://ec.europa.eu/consumers/odr/.

Caje dl mëis

N consumadú talian vëiga l'oferta de n'aziënda franzeja che vënn bocá dai ciüfs acorc. Defati vára da bagné a destanza i ciüfs de ciasa tres n'app, ajache i bocá á sensurs cun chi che ara vá da regolé la cuantité d'ega. Le consumadú ti á atira ortié inant al'aziënda so ordin y al á ince atira ciafé sü bocá dai ciüfs. Le problem dl consumadú ê l'app istalada sön so fonin: ara ne funzionâ nia sciöche ara ess messü y les soluziuns desvalies proponüdes dal'aziënda ne ogâ nia por tó y jí i problems tecnics segnalá. Ingalin n'é le consumadú nia plü sté bun da comuniché cun le profescionist. Al á damané aiüt ala Zentrala Europeica di Consumadus Talia (ZCE) – ofize de Balsan, che á ortié inant la pratica ala ZCE Francia. La ZCE Francia á contaté danü le profescionist che á organisé la spediziun por podëi rete i bocá dai ciüfs. N iade rová te magazin ti él gnü retü al consumadú la soma spenüda.