Verbrauchertelegramm Europa-Ausgabe Setëmber 2017

Beilage zur ladinischen Europa-Ausgabe Nr. 71 - Redaktion: Europäisches Verbraucherzentrum

IADI Y VACANZES

Ci che al é bun savëi sce na compagnia de jore vá en malora
Do che de ma dl 2017 é Alitalia gnüda metüda sot a n'aministraziun straordinara él sëgn indô na compagnia de jore europeica che prezipitëia: Air Berlin, la secunda majera compagnia de jore todëscia, á damané amez agost che al gniss invié ia na prozedöra d'insolvënza. Mo ci ó pa chësc dí por les consumadësses y i consumadus sön le iade? Imprömadedöt él da dí che i jori programá de Air Berlin messess ester garantis por i proscimi trëi mëisc. Le govern todësch á metü a desposiziun n credit-punt de 150 miliuns de euro por podëi pité inant i jori. Sön süa plata internet garantësc Air Berlin che düc i jori vëgn fac, che le plan y les chertes de jore prenotades vel inant y che al é cinamai poscibl prenoté ince d'atri jori. Por informaziuns plü avisa y consëis d'ütl por iadi cun le fligher Air Berlin pón jí sön la plata internet: www.euroconsumatori.org.

IADI Y VACANZES

Atentac, tremoroc, catastrofes naturales
Canche al vëgn a s'al dé öna dles situaziuns nominades dessura á la consumadëssa/le consumadú la poscibilité da se retrá da n iade paian la tassa d'anulamënt preodüda dal contrat stlüt jö cun le prestadú dl sorvisc (l'agenzia de iade, la compagnia de jore, l'hotel y i.i.): cun la cumpra de n sorvisc turistich vëgnon obliá da paié ci che an á prenoté, mo nia da pié ia. Le prestadú s'impegnëia dal'atra pert da pité le sorvisc (le pachet de iade, la ciamena de hotel, l'auto impresté) sciöche fat fora. Porchël sce ara vá tres ciamó da pité na prestaziun da pert dl organisadú (por ejëmpl sce l'hotel pó gní adoré ince do da n atentat teroristich) vëgnel ince pretenü dal consumadú süa cuntraprestaziun (chël ó dí le paiamënt dl prisc). Atentac, catastrofes naturales y la tëma da fá n iade n'é nia avenimënc che vëgn curis da assiguraziuns de iade por la retrata. Ma sce al ess da ester n avertimënt ofizial dal Ministere di afars cun l'ester por ci che reverda chël travert de iade él poscibl da se retrá dal iade debann. Informaziuns plü avisa él da ciafé sön la plata internet dla Zentrala de Consumadus Europeica.

AUTO

Multes da foradecá - ci che al é bun savëi!
An fajess ion a manco de n avis de paiamënt por na straufunga sön strada da foradecá.
Y deache an ne se intopa nia cis cun de te cosses y ince deache al é sozedü al ester án la tendënza da ne orëi daldöt nia se dé jö impara. Indere de te lëtres ne fossel pordërt nia ma da ignoré. N valgügn consumadus s'informëia sön les modalités che al é da fá recurs, mo la domanda che vëgn dant le plü gonot é ciodí che y sce al é da paié na multa da foradecá. La Zentrala di Consumadus Europeica (ZCE) Talia - Balsan ves dëida stlarí üsc dübi por ci che reverda les multes che vëgn da foradecá.


Caje dl mëis
Dan da püch é la Zentrala di Consumadus Balsan gnüda contatada da n consumadú che s'â comané n set de rodes da na plata web de azessurs da jí cun la roda. Le consumadú á dit che la plata internet ê registrada tla Germania y che do che al â comané y paié le patüc ne n'âl plü ciafé resposta no por e-mail, no por telefon. Deache la soma ê de 1.925 euro y al â paié döt l'import tres n paiamënt bancar (y porchël ne jôra nia da damané le rembursamënt “charge-back” tres la sozieté de cherta de credit) se cruziâl y se ponsâ che al n'ess mai plü odü sü scioldi. Le consumadú ti â bele mené al comerziant n'esortaziun scrita tres lëtra racomanada cun recioiüda derevers, mo zënza resultac. Insciö ti ál surandé le caje ala ZCE Balsan che á contaté sü colegs todësc. Chisc á porvé plü iadi da ti scrí al comerziant, mo gnanca ai ne n'á ciafé na resposta. Mo scebëgn che le comerziant ne ti á respognü a degügn pél impó che al sides a val' manira rové sot a presciun y porchël ti ál madër retü al consumadú do da n valgönes edemes zënza comentar döta la soma de 1.925 euro.