Verbrauchertelegramm Europa-Ausgabe Novëmber 2017

Beilage zur ladinischen Europa-Ausgabe Nr. 87 - Redaktion: Europäisches Verbraucherzentrum

CUMPRES ONLINE

Ci mësson pa savëi sön le dërt de garanzia
Na consumadëssa ungareja cumpra n’ora sön n sit internet talian. Püch dedô che al ti vëgn mené l’ora mët man i problems: vigni de perd l’ora n valgügn menüc y do da püch ne vára daldöt nia plü. Co, can y cuntra che mësson pa fá avarëi le dërt de garanzia? Le dërt de garanzia é n dërt nia da fá a manco che le consumadú mëss fá avarëi ti confrunc dl boteghier. Sovënz pënsa les porsones da messëi jí dal produtur, mo chësc vel ma sce le boteghier é ince le produtur. La dorada dl dërt de garanzia é de altamo dui agn te düc i Paisc dl’UE. Sön le sit internet dla ZCE ciafon de plü informaziuns sön le dërt de garanzia.

IADI Y VACANZES

Aiüt: la compagnia di fligri á pordü mi cufer!
Al é le bur some de vigni porsona sön le iade: la compagnia di fligri perd le cufer o le cufer röia adalerch, mo al é roviné. Baldi röia chëstes reclamaziuns vigni de adalerch tla Zentrala di Consumadus Europeica (ZCE) Talia - ofize de Balsan - y chësc vëgn ince confermé dai dac statistics.
Al é rové adalerch passa 200 segnalaziuns tla ZCE Talia dal 1° de ma cina incö. Mo al é n valgügn consëis y racomanaziuns por porvé da limité le prigo de chisc inzidënc. Sce i ëis domandes o na reclamaziun concreta cuntra na compagnia di fligri jide dala Zentrala di Consumadus Europeica Talia de Balsan: dal sit internet podëise desćiarié debann i modí de lëtres da ti ortié ala compagnia.

CUMPRES

Limic mascimai di paiamënc cun scioldi contanc
Orëise cumpré mebli tla Francia, paié le cunt de n artejan belga o paié l'afit por osta ciasa tla Talia? A pert la Germania, olache al n’é nia al momënt n limit mascimal por i paiamënc en contanc, á tröc paisc dl'UE fissé na soma mascimala. Le limit mascimal por i paiamënc cun scioldi contanc tla Talia é de 2999,99 euro. Tl caje de violaziuns, é la sanziun minimala de € 3.000, che pó gní alzada cina al 40% dl paiamënt te contanc. I ciafëis de plü informaziuns sön la homepage de nüsc colegs todësc.

Caje dl mëis

Compensaziun te scioldi tl caje de straicada dl jore
N grup de turisć talians â aposté da na compagnia de fligri spagnola n jore da Minca a Lima, cun coinzidënza a Madrid. Le jore da Minca a Madrid é jü bun, deperpo che chël por Lima é gnü straiché dan la partënza. La compagnia di fligri á bëgn organisé por i passajiers na nöt te hotel, aspetan le jore alternatif (debann), sciöche preodü dales desposiziuns europeiches sön i dërc di passajiers di fligri. Ci che la compagnia di fligri n’á indere nia fat é sté reconësce la compensaziun de 600 euro preodüda dal Regolamënt (CE) n. 261/2004 por i caji de straicada dl jore, baian de na situaziun ezezionala. Nüsc colegs dla Zetrala di Consumadus Europeica Spagna á ortié inant la pratica al'autorité spagnola (AESA – Agencia Estatal de Seguridas Aérea) che se crüzia da controlé che al vëgnes respeté i dërc di passajiers. Chësta á confermé che i passajiers á le dërt de compensaziun, ajache le jore n’ê NIA gnü straiché por rajuns ezezionales. Por mirit di colegs y dl'autorité spagnola á i consumadus talians ciafé 600 euro a ce!