Verbrauchertelegramm Europa-Ausgabe Decëmber 2021

Beilage zur ladinischen Europa-Ausgabe Nr. 94 - Redaktion: Europäisches Verbraucherzentrum


SHOPPING ONLINE

Prisc nia da perde por ocajiuns falzes

Tröc cumpra plü ion les scincundes da Nadé bel comot da ciasa y n’ó sambëgn nia se lascé sciampé n’ocajiun. Da dagnora incá dij la Zentrala Europeica di Consumadus (ZCE) da mëte plü averda canche an cumpra ite online y da ciaré da se stravardé da trapolades por ne tomé nia tla tënora. Al é important da controlé bun la plata web dla botëga: sce al mancia informaziuns detaiades sön i contac y sce les condiziuns generales dl contrat ne fornësc nia detais sön le dërt de retrata debann y sön la garanzia legala, él damí da lascé ester. Che che clichëia sön le reclam sön i social paia spo sovënz cun cuntrassëgn le postin zënza ne savëi gnanca che che le venditur é. Te chisc caji ne sciafion gnanca da ciaré da porvé da s’la fá fora. Jide sön nosc sit por consëis d´öga por na ciacia ai afars online sigüda.


COVID VOUCHER IADE

Le fonds de garanzia é na realté ma por püc

Al é finalmënter gnü ativé le fonds de garanzia por indenisé i titolars di Covid-voucher dá fora dai operadus turistics y dales impreses de trasport y nia retüs porvia de insolvënza o falimënt dl operadú comerzial. Les domandes, cun le voucher nia adoré y la domanda de retüda ortiada zënza resultat al operadú turistich, messará gní dá jö cina les 12.00 di 31 de dezëmber dl 2021. Les modalités de presentaziun spezifiches gnará publicades cun l’avis aposta sön le sit dl Minister dl turism. Ciaredeti a nosc comunicat stampa por de plü informaziuns.


TRADING ONLINE

Degun like por i trading online nia autorisá sön i social network

Tröpes porsones che sparagna s’anüza de internet y dantadöt di social media por ciafé informaziuns sön co investí sü scioldi. Porimpó vëgn i medemi stromënc adorá ince da trapoluns che s’adatëia debota ales tecnologies nöies y s’anüza di social network por trapolé che che ne mët nia averda. Che che “investësc” tres chisc canai ne pó sovënz nia speré da podëi recuperé la soma investida. Por ne se lascé nia tan saurí ingiané, dá la ZCE Talia n valgügn consëis.


CAJE DL MËIS
N consumadú talian â aposté de jená dl 2020, canche les faziuns dla pandemia n’ê nia ciamó da preodëi, na sojornanza te n hotel a Hamburg por les vacanzes da Pasca dl 2020 paian passa 800 euro. Le lockdown cun sües proibiziuns de iade sciodes varëntes tla Talia â fat a na moda che al ne podess nia s’anuzé dla sojornanza. Te chël tëmp ne podô gnanca le hotel todësch tó sö ghesć por rajuns turistiches. Le consumadú â damané che al ti gniss retü i scioldi, mo le hotel ti â ma dé n voucher por n’apostaziun nöia che valô n ann. Le consumadú n’á nia ciafé na manira da adoré le bonn y d’aisciöda dl 2021 ál indô damané che al ti gniss retü i scioldi. Al á ciamó n iade ciafé na resposta negativa: le voucher ê bele tomé y ara ne jô nia plü da le arlungé. Le consumadú é jü dala Zentrala Europeica di Consumadus Talia y ara é jüda da ciafé na soluziun. Do la normativa todëscia ess le hotel messü ti rete atira la soma, ajache al n’â no pité le sorvisc no n’essel podü le fá porvia dla proibiziun da ti pité ciamenes a turisć, che valô canche al é gnü fat la prenotaziun. Do l'intervënt dla ZCE Germania ti él finalmënter gnü retü al scomenciamënt d’otober dl 2021 la soma. A dí che an dij: miú tert co mai!