Verbrauchertelegramm Europa-Ausgabe Juni 2021

Beilage zur ladinischen Europa-Ausgabe Nr. 46 - Redaktion: Europäisches Verbraucherzentrum


PRENOTÉ JORI ONLINE
Ciodí che al ne paia nia dagnora la mëia da adoré portai de intermediars online
Le internet vá dër bun por fá inrescides, cumpré ite, fá prenotaziuns de vigni sort. Te döta la rëi él da ciafé portai d'intermediars che vëgn gonot adorá deache ai tol ite de plü ofertes y ti dá ales consumadësses y ai consumadus la poscibilité da ciafé döt tl medemo post. Por ci che reverda la cumpra de na cherta de jore indere, aconsiëia la Zentrala di Consumadus Europeica (ZCE) da s'informé diretamënter sön les plates internet dles compagnies de jore por schivé i desvantaji te chi che an pó salté sön i portai de prenotaziun. Por ciafé consëis da prenoté n jore y gní alsavëi ci problems che an podess incunté sön les plataformes de intermediars, liede nosc comunicat stampa sot al link: https://www.euroconsumatori.org/it/news_it/652.

FESTA DL'EUROPA
I ciarun dereves a nüsc suzesc
Vigni ann ai 9 de ma vëgnel tigní la festa dl'Europa. Te chësta ocajun á la Zentrala di Consumadus Europeica (ZCE) ciaré derevers al ann impormó passé y ince inant al dagní. Dl 2020, n ann dër ri por düc, á la rëi dles Zentrales di Consumadus Europeiches ECC-Net, pro chëra che al toca ince la ZCE Talia, messü se porvé ciamó deplü por ti sté dlungia ales consumadësses y ai consumadus cun sü problems. La ECC-Net é insciö stada bona da ciafé na soluziun positiva te passa le 70% di caji olache al ê gnü damané do so aiüt. A chësta moda éra jüda da recuperé por les consumadësses y i consumadus feter 4 miliuns de euro da reclamaziuns liades ala pandemia. De plü informaziuns: https://www.euroconsumatori.org/it/news_it/648.

AGCM CUNTRA EASYJET
Sanziun da miliuns de euro
La multa che l'Antitrust ti á fat ala sozieté de fligri easyJet por pratiches comerziales nia iüstes amunta a prësc 3 miliuns de euro. L'oget prinzipal dl'inrescida dl'Autorité Garanta dla Concorënza y dl Marcé (AGCM) é sté le comportamënt dla compagnia de fligri en referimënt ala straicada de jori dai 3 de jügn dl 2020, deache da chësta data n'êl nia plü limitaziuns de movimënt tla Talia. En conscidraziun di amonimënc dl'AGCM y dla sanziun da 2,8 miliuns de euro s'á easyJet impegné da mioré so sorvisc. De plü informaziuns: https://www.euroconsumatori.org/it/news_it/651.

CAJE DL MËIS
Por le de de san Varentin á n consumadú talian aposté ciüfs por süa chestiana sön na plata web todëscia. I ciüfs n'é indere nia gnüs dá jö... Implü s'á l'aziënda paré da orëi rete le prisc de cumpra se tolon a dí che la misciun dada dant ê falada o nia da ciafé. Le proscimo iade fajess le consumadú damí da dé dant le numer de telefon dla destinatara por schivé problems de chësta sort.
Mo deache al ti ê gnü dé la dërta misciun al'aziënda y al ne manciâ gnanca le numer de telefon s'á le consumadú inzafoté dassënn. Al á fat na reclamaziun sön n portal internet, mo al n'á jové döt cant nia. Insciö ál contaté la Zentrala di Consumadus Europeica (ZCE) che ti á mené inant le caje al ZCE Germania. Por desmostré che al ê saurí da ciafé sö la misciun á le consumadú injunté n screenshot de n sorvisc de mapes online y les foto dl'entrada dla ciasa y la bronsina cun l'inom dla destinatara. Y al á arjunt ci che al orô: le sorvisc da ortié ciüfs á odü ite che al á falé y ti á retü l'import paié al consumadú.