Verbrauchertelegramm Europa-Ausgabe Lugio/Agost 2014

Beilage zur ladinischen Europa-Ausgabe Nr. 49/56 - Redaktion: Europäisches Verbraucherzentrum


Dërć di consumadus

Dërć nüs por sconè le consumadù europeich

Ai 13 de jügn él jü en forza te düć i paîsc dl'UE i dërć nüs por sconè i consumadus. Le legisladù talian à rezepì la diretiva comunitara che à mudé de plü articui dl Codesc dl Consum, dantadöt por ći che reverda le comerz eletronich y i contrać a destanza y chi stlüć jö defora dai locai comerziai. La diretiva dà na gran importanza ai dovëis informatifs precontratuai a ćiaria dles aziëndes. Implü vëgnel uniformè a livel europeich le terminn por se trà zoruch da n contrat stlüt jö a destanza o stlüt jö defora dai locai comerziai: śëgn él 14 dis de calënder te düć i Paîsc dl'UE (ćina incö tla Talia êl 10 dis da laûr). Inće la fornidöra dla marćianzia o dl sorvisc mëss gnì fata te 30 dis dala data de contlujiun dl contrat, ater co sce al vëgn fat fora val’ d’ater danter les perts. Por conësce dötes les novitês por i contrać a destanza y chi stlüć jö defora dai locai comerziai jide sön nosc sit internet.


Comerz eletronich

Metede averda ales bolëtes dl telefonn falzes

Les ultimes edemes él rové adalerch tla Zentrala di Consumadus Europeica (ZCE) de Balsan de plü segnalaziuns sön e-mails da compagnies dl telefonn (Deutsche Telekom y Vodafone) cun sënta tla Germania olache al gnô damanè da paié bolëtes dl telefonn. Tles e-mails êl n link prigorus: n invit a desćiarié n file cun la fatura. I ne se stanćiarun mai da ves dì da mëte averda sides ai links tles e-mails co ti sms: an risćia da gnì ortià inant sön sić che é bugn da istalè sön l'aparat adorè programs che spicolëia i dać o sön sić che porta l’utënt a mëte ite de süa bona sü dać personai.


Vacanzes y iadi

Al vëgn arbassè i cosć dl roaming tl'UE, metede averda sce i jëis defora dl’UE

Al 1. de messè él gnü arbassè ćiamò n iade i cosć por les telefonades, i sms y le trafich internet te roaming tl'UE (mo nia defora dl’UE!). Por ejëmpl él bun da savëi che al é preodü na tarifa mascima de 20 zentejimi (plü IVA) al megabyte (MB) por desćiarié dać o jì te internet al èster tl’UE.
Sce i jëis indere en vacanzes defora dal'Uniun Europeica, por ejëmpl tl Egitto, Turchia o Tunisia, podéssera gnì ćera da telefonè, scrì SMS y jì te internet cun le smartphone. De plü informaziuns é desponibles sön le sit dla Zentrala Consumadus Europeica de Balsan.


ECC-net: Travel App

La app por i consumadus europeics sön le iade

La Rëi dles Zentrales di Consumadus Europeiches (ECC-Net) à cherié na aplicaziun nöia por smartphone y tablet: la ECC-Net: Travel App. La app nöia é n compagn de iade indespensabl por chi che é sön le iade tl’Uniun Europeica, Islanda y Norvegia, che dëida i consumadus ciafè na soluziun por i problems che po gnì a s’al dé tratan na vacanza al éster, y spliga cai che é i dërć di consumadus tles situaziuns desvalies. De plü informaziuns é da ciafè sön le sit dla ZCE de Balsan.

Caje dl mëis

Le signur Sicurini - che vir tla Germania – mët dagnora averda canche al apostëia n hotel da chirì fora n'oferta olache al sciafia da cancelè la sojornanza te cört tëmp. Insciö àl apostè so hotel a Aunejia tres n portal d’apostaziun che conzed – tla verjiun todëscia – la poscibilité da desdì ćina a 72 ores denanco rové dailò. N’àl pa nia sciafié chësc iade da jì en vacanza y messü renunzié al iade y cancelè la prenotaziun; l'hotel ti à indere respognü che al se tratâ de na ćiamena olache al ne gnô nia retü iscioldi. Le signur Signorini s’à spo intenü che chësta informaziun ê dan man söl portal d’apostaziun, mo ma sön la plata por inglesc, y nia sön chëra por todësch, sciöche les atres condiziuns sön la retrata. Porchël él jü dala Rëi dles Zentrales di Consumadus Europeiches contatan la Zentrala tla Germania che à ortié inant la pratica ala ZCE Talia. La consulënta dla ZCE da Balsan à contatè le hotel a Aunejia y an minâ da ciafè naôta na resposta negativa, mo insciö n’éra nia stada: l'hotel à atira dé pro le fal y s’à tut dant da rete la soma intiera.