Verbrauchertelegramm Europa-Ausgabe Utober 2023

Beilage zur ladinischen Europa-Ausgabe Nr. 78 - Redaktion: Europäisches Verbraucherzentrum


LA GARANZIA

Le manual dla Zentrala di Consumadus europeica

La garanzia legala é - sciöche tröc sá - le dërt che les consumadësses y i consumadus pó fá avarëi ti confrunc de n comerziant/na comerzianta sce la marcianzia cumprada é da defet o á carateristiches che ne ti corespogn nia a ci che vëgn preodü tl contrat. Le comerziant/La comerzianta mëss respogne por i defec che vëgn sö tl tëmp de 2 agn da canche al é gnü consegné la marcianzia. Sce le defet vëgn fora ti pröms 12 mëisc do che an á cumpré le produt spo vëgnel araté che le defet ê bele canche al é gnü consegné, ater co sce al vëgn desmostré le contrar. La Zentrala di Consumadus europeica (ZCE) á lauré fora n manual cun laite döt ci che al foss bun da savëi sön le tema dla garanzia. Le manual é da ciafé sot a chësc link.

MARCIÁ DIGITAI

De plü oblianzes por i gatekeeper

La normativa sön i marciá digitai dl'UE vëiga danfora oblianzes particolares por i insciödic gatekeeper. Ara se trata de portai che á na posiziun economica sterscia cun na faziun importanta sön le marcé intern, che coliëia n gran numer de anuzadësses y anuzadus cun tröpes aziëndes y che á na posiziun consolidada sön le marcé. Tl caje concret á la Comisciun europeica classifiché chëstes aziëndes sciöche gatekeeper: Alphabet (Google), Amazon, Apple, ByteDance (Tiktok), Meta (Facebook) y Microsoft. Chëstes aziëndes ne pó sëgn danterater nia plü ti resservé a sü sorvisc y produc n tratamënt privilegé tla classificaziun respet a sorvisc y produc somiënc, che vëgn pitá da terzi sön sües plataformes. Ares ne pó nia plü ti impedí ales anuzadësses y ai anuzadus, sce ares/ai ó, da desistalé aplicaziuns o software istalá bele danfora y gnanca ti jí do por rajuns de publizité mirada ales anuzadësses finales y ai anuzadus finai defora dai sorvisc dla plataforma, zënza so consëns espressif. Por gní lassura ci che gatekeeper pó o ne pó nia plü fá podëise consulté la plata web dla Comisciun europeica.

Le podcast dla ZCE

I consëis dla ZCE te na verjiun audio

Na novité por che che é interessá al'ativité dla Zentrala di Consumadus europeica: al é dër gnü fora la pröma pert de UE´Consumatore, le podcast nü dla ZCE: n apuntamënt, a chël che an pó se conforté vigni mëis, dediché ales consumadësses y ai consumadus dla Talia y dl'Europa che gnará condüc sön n iade fora por i temesc dl dërt dl consum, dla sostignibilité y dl'inclujiun. I sun da ciafé vigni mëis te n format audio sön dötes les plataformes conesciüdes. Chiló gnëise alsavëi olache i sun da ciafé.

CAJE DL MËIS
N consumadú franzesc â cumpré na e-bike da 1.079 euro da n comerziant online talian. Canche la roda ti ê gnüda consegnada n'êl degöna fatura lapró. Deache, aladô dl dërt franzesc, mëss i comerzianc dagnora fá na fatura ince sce al vëgn cumpré valch online, s'á le consumadú ponsé che al n'ess ciafé öna y á porchël damané do pro le comerziant. Chësc ne ti á indere nia respognü.
Insciö ál perié la Zentrala di Consumadus europeica (ZCE) Francia da contaté la ZCE Talia y damané da antergní pro le comerziant de e-bike. La consulënta legala dla ZCE Talia á naota informé la colega franzeja che tla Talia ne mëss les botëghes online nia fá automaticamënter na fatura y che an mëss scinancaje la damané bele canche an comana n produt. Mo nosta Zentrala orô sambëgn porvé da ciafé na soluziun y ti á porté dant al comerziant online ci che le consumadú franzesc se ghirâ. Chësc nes á respognü bele en chël de dijon che al ne â nia ciafé la domanda do na fatura da pert dl consumadú y che al foss sambëgn sté a öna da nen arjigné ca atira öna.
A vigni moda: al é bun da savëi che tres de plü aziëndes desmostra la orenté da colauré cun Zentrales di Consumadus sciöche la nosta y ciaré da ciafé na soluziun deboriada.