Verbrauchertelegramm Europa-Ausgabe Jügn 2023

Beilage zur ladinischen Europa-Ausgabe Nr. 46 - Redaktion: Europäisches Verbraucherzentrum

METEDE AVERDA ALA TRAPOLADA

Les segnalaziuns de caji de trading online falz vá inant

Döt mët man cun na telefonada che an ne s'aspeta nia olache na bela usc proponn investimënc da n gran davagn, n’ocajiun unica: l’investimënt tl scomenciamënt é ma de 250 €. Che che se lascia baié sö trasferësc ala fin sovënz bel plan ince de gran somes de scioldi, cun la convinziun che an davagnes na gran soma. Pornanche an damana che al vëgnes retü i scioldi investis se müda döt: che che trapolëia mët man da trá ca vertores por ne rete nia i scioldi y sparësc. Le resultat final é dagnora le medemo: i scioldi sparagná s'un é. Liede sön la plata web dla Zentrala di Consumadus Europeica (ZCE) de ci strategies che che trapolëia s'anüza de regola por freghé la jënt.

DE DL'EUROPA 2023

La Rëi ECC-Net publichëia i resultac arjunc dl 2022

En ocajiun dla festa dl De dl'Europa á la Zentrala di Consumadus europeica Talia lascé alsavëi i resultac arjunc dl 2022 dala Rëi ECC-Net, che á recuperé feter diesc miliuns de euro a bëgn di consumadus y dles consumadësses, conferman insciö da ester n referimënt important por la jënt de döta l'Europa y n stromënt de dërta proteziun. Le dërt benefize economich é pordërt maiú: te tröc caji á la Rëi ECC-Net avertí la jënt schivan da ti fá paié scioldi surapró o da gní trapolada. Te vigni paisc dl'UE, tl'Islanda y tla Norvegia él na Zentrala di Consumadus europeica che pó implü gestí debann reclamaziuns extraiudiziares dla jënt, sce ares vá sura i confins fora. Por aprofondimënc.

COMERZ ELETRONICH

Metede averda ai fake shop!

La Zentrala di Consumadus europeica ciafa tres ciamó segnalaziuns de porsones che vëgn trapolades ajache ares proa da cumpré val' online dales insciödites "fake shop" (botëghes falzes), che ares á sovënz ciafé tres inserac publicá sön i social media. Al vëgn sovënz comané produc de marca y dër bunmarcé, mo ala fin ne vëgn la marcianzia nia ortiada o al vëgn ortié n ater produt de dër na stleta cualité o cinamai daldöt val' d'ater da ci che an á comané. N consumadú che mët dagnora averda da adoré sistems de paiamënt sigüsc é salté te n sit che conzedô da paié tres Paypal. Le consumadú s'á a vigni moda intenü por tëmp y ora che sce an clicâ sön le link se daurîl la funziun “ortié scioldi a n compagn”. Chësta opziun n'é mai da adoré por paié n produt, ajache ara n'é nia liada a na garanzia por che che cumpra. Sce i capitëis te na botëga online che ó se fá paié sciöche sce ara foss n compagn o na compagna a chël/chëra che i ti ortiëis scioldi, lascede io ester: al é feter dessigü na fake shop. De plü informaziuns é da ciafé online.

CAJE DL MËIS
Na consumadëssa taliana á aposté n jore da Helsinki a Aunejia cun na compagnia de fligri irlandeja. Le jore é arsí a Aunejia cun n'intardiada de feter cater ores. Aladô dles desposiziuns europeiches sön la proteziun di passajiers, ti spetel a che che jora cun n fligher che á passa trëi ores de intardiada, porvia de na rajun liada ala compagnia de fligri y porchël nia liada a situaziuns ezezionales, na compensaziun de scioldi de 250, 400 y 600 euro, aladô dla lunghëza dla trassa dl jore. La consumadëssa á contaté la compagnia de fligri y á damané le paiamënt de chësta compensaziun. Mo la domanda dla consumadëssa é romagnüda zënza resposta, porchël ára damané assistënza ala Zentrala di Consumadus europeica Talia. La reclamaziun é gnüda partida cun la Zentrala di Consumadus europeica Irlanda che á contaté la compagnia di fligri a inom dla consumadëssa. Dedô ti á la compagnia de fligri retü ala consumadëssa 400 euro sciöche compensaziun de scioldi.