Verbrauchertelegramm Europa-Ausgabe Merz 2023

Beilage zur ladinischen Europa-Ausgabe Nr. 23 - Redaktion: Europäisches Verbraucherzentrum


LE DAZ TL’UE

Na lovina de domandes de paiamënt y straufunghes dal’Austria

Da mez jená dl 2023 incá á la Zentrala di Consumadus Europeica (ZCE) Talia ciafé tröpes segnalaziuns che reverda les domandes de paiamënt che vëgn dantadöt dal'Austria por i dac che ne dess nia ester gnüs paiá. Tröpa jënt che vá cun l'auto segnalëia indere che ara á paié le daz cun contanc, mo che ara ne ciafa nia plü la cubita o la copia dla vignëta digitala por le desmostré, ajache al é bele tan dî ca o d'avëi taché sö sciöche al alda la vignëta sön le vider dant dl auto. Chëstes domandes depënn bonamënter dala diretiva UE 520/2019 che alisirëia l'azes da pert di conzescionars dl'autostrada ai dac sön i patruns di veicui por podëi ghiré le paiamënt dl daz nia paié. Liede sön le sit dla ZCE a ci che i messëis mëte averda, sce i jëis sön strades sotmetüdes al paiamënt de n daz foradecá.

INFLUENCER MARKETING

Ci él pa, cai é pa sü prighi y de ci mësson pa tigní cunt?

L’influencer marketing é n fenomen dër svilupé dantadöt sön i social. Le consumadú mesan tol na dezijiun sön co spëne sü scioldi aladô de faturs desvalis, un de chisc é la insciödita "reproa soziala": n mecanism psicologich por assiguré i utënc sön sües dezijiuns de cumpra, se lascian sön le fat che bele d'atres porsones á cumpré chël produt o chël sorvisc. Se lascé sön n'atra porsona zënza ponsé, zënza ester cosciënc dl mecanism psicologich, podess ester prigorus por les consumadësses y i consumadus. Dlungia n influencer profescionist scerio pón ince salté te porsones nia profescionales o che ne mët nia cis averda al’etica cun chëra che ares promöi sü produc. Implü pó i influencer, sciöche düc, ince se falé y fá promoziuns por aziëndes nia corëtes. Le monn dl influencer marketing n’é nia ciamó regolé avisa y tratan che an aspeta do normes plü avisa en materia él important da se recordé che i post promoiüs dai influencer ti vá a vigni moda do a logiches de reclam. Por de plü informaziuns.

CUMPRÉ CHERTES ONLINE

La dërta cherta: na campagna dl'AGCOM

Tres de plü consumadësses y consumadus cumpra chertes por evënc, manifestaziuns sportives y conzerc sön internet. Porimpó ne vá nia dagnora düc sön i sic ofiziai di organisadus o dales agenzies de venüda ofiziales, mo röia datrai sön i sic nia autorisá de "secondary ticketing” por cumpré les chertes y chël a prisc cotan plü alc. Por sensibilisé les consumadësses y i consumadus á l’Autorité por les Garanzies tles Comunicaziuns (AGCOM) metü a jí na campagna informativa sot le hashtag #ilbiglietto giust.

CAJE DL MËI
Na consumadëssa taliana â comané n per de cialzá da na botëga web todëscia. Le paiamënt é gnü fat cun contrassëgn, chël ó dí che al é gnü paié cun contanc le curier. Ajache i cialzá ne ti jô nia bun á la consumadëssa informé por scrit le venditur de süa orenté da eserzité le dërt de retrata. Porchël ára scrit fora le formular aposta cun sües coordinades bancares y ti á dé le poch al curier por la retüda. Ince sce le curier é sté bun da confermé che le poch ê gnü dé jö te botëga, ne ti él nia gnü retü i scioldi. La consumadëssa á contaté l'aziënda, che s´á refodé da ti rete i scioldi, sostignin che le poch ti foss indô gnü ortié zoruch al mitënt ajache le curier n’ê nia sté bun da le dé jö. Aladô dla recostruziun dl’aziënda ne fossel gnanca gnü paié y porchël ne ti gnissera degöna retüda. Ince sce la consumadëssa á desmostré a na moda tlera da avëi ciafé le poch, da avëi paié y da ti l’avëi indô surandé al curier val’ de dedô, á la botëga fat sciöche sce nia ne foss y la consumadëssa é ala fin jüda dala Zentrala di Consumadus Europeica (ZCE) Talia. Cun l'aiüt de nüsc colegs dla ZCE Germania sunse stá bugn da ciafé na soluziun:y l'aziënda ti á retü ala consumadëssa le prisc de cumpra tres paiamënt bancar.