Verbrauchertelegramm Europa-Ausgabe Auri 2023

Beilage zur ladinischen Europa-Ausgabe Nr. 30 - Redaktion: Europäisches Verbraucherzentrum

LES ATIVITÉS DLA ZCE

Al é ora da ti ciaré a döt ci che i un arjunt!

Le de mondial di dërc dl consumadú, ai 15 de merz, ti á pité l’ocajiun ala Zentrala di Consumadus Europeica (ZCE) Talia da fá n bilanz dles ativités dl ann passé. Pro i temesc plü ziti tratá él le caos dl trasport di fligri l'ann passé d'isté, les problematiches liades ai insciödic voucher covid, a pert i temesc liá al’e-commerce y ales trapolades online y nia. Dl 2022 él gnü gestí indöt bëgn 10.241 domandes dai ofizi da Balsan y Roma, danter chëstes êl 999 reclamaziuns de consumadësses y consumadus foresć ti confrunc de aziëndes talianes y 967 reclamaziuns de zitadines y zitadins talians ti confrunc de profescionisć tl'UE, por indöt ca. 730.000 € recuperá a bëgn dles consumadësses y di consumadus europeics. De plü informaziuns ciafëise chiló.

BUY NOW PAY LATER

Al pé interessant, mo al comporta prighi

La formula de cumpra “buy now, pay later”, che vëgn proponüda sovënz online, pé atira na cumpra classica a rates, mo ara á pordërt de plü particolarités respet al credit de consum tradizional. Le consumadú ne vëgn nia sotmetü a controi sön so mirit de credit: a chësta moda él dër saurí da ti rové debota pormez a n finanziamënt. Al pó deventé interessant da partí sö te rates le paiamënt de sües cumpres ince por de pices somes, dantadöt por che che n'á nia azes al credit de consum classich. Le majer prigo é sigü chël da perde la vijiun generala sön so debit. I problems pó gní sö sides tla fasa dan la cumpra, dantadöt sce les informaziuns precontratuales ne foss nia trasparëntes assá, che do la venüda. Plü ri él indere por i consumadus y les consumadësses da eserzité i dërc preodüs dala lege, dantadöt la garanzia legala y le dërt de retrata. I ciafëis de plü informaziuns chiló.

SURANTUTA LA DIRETIVA OMNIBUS
<title3>Le dërt di consumadus s'adatëia al monn digital</title<3>
Finalmënter surantol ince la Talia la diretiva UE 2019/2165 che mudará nosc codesc dl consum. Danter les novités plü importantes él le dovëi por i profescionisć che arbassa le cost di produc da vëne da dé dant le prisc plü bas ti 30 dis denant, le dovëi por i sic web da preodëi mosöres por garantí che les rezensciuns publicades ne sides nia falzes y la poscibilité por i consumadus che é gnüs trapolá da damané la refata dl dann, l'arbassamënt dl prisc o la ressoluziun dl contrat. Por de plü informaziuns.

CAJE DL MËIS
N consumadú austriach â aposté n'abitaziun tla Talia sön na plataforma d'apostaziun. Ajache al â ma debojëgn de n post por dormí do n jore lunch y messâ joré le de do adora, s'âl chirí fora n post bunmarcé atira dlungia l'aeroport. Püces ores denant co joré tla Talia âl ciafé na burta noela: la strotöra â straiché la prenotaziun zënza le contaté denant. Le cost de feter 60 euro ê atira gnü retü, mo le consumadú ê romagnü ala fin zënza n post da dormí. La plataforma d'apostaziun ti â ma proponü hotí plëgns y dalunc dal aeroport. Le consumadú á messü instës s'aposté n ater hotel, cater iadi plü cer y ma da arjunje cun le taxi. Al á paié 250 euro surafora y la plataforma ti á retü gran pert dla soma, mo 20 euro é romagnüs a ciaria dl consumadú. Le consumadú á damané che la strotöra surantoless le paiamënt y la refata dl dann de 100 euro surapró por le stress y i problems gaujá. Do la reclamaziun n'él sozedü nia y porchël él jü dala Zentrala di Consumadus Europeica, che á contaté la strotöra. La strotöra a mudé süa idea, mostran da orëi colauré y á azeté ala fin da paié la soma damanada.