Verbrauchertelegramm Europa-Ausgabe Ma 2023

Beilage zur ladinischen Europa-Ausgabe Nr. 39 - Redaktion: Europäisches Verbraucherzentrum

IADI

Passaport, visa, variores & Co.

Savôse che les porsones che ó jí ti Stac Unis mëss tres ciamó avëi la variora cuntra le Covid? Y che por jí te tröc Paisc dl monn ól ester n passaport che vel por almanco ciamó sis mëisc dala dorada dl iade? Y che por jí tla Gran Bretagna n'orarál nia ma plü ester n passaport, mo tosc ince n'autorisaziun d'entrada eletronica a paiamënt? Sce i organisëis instësc osc iade informesse adora assá sön les desposiziuns de iade desvalies, sciöche por ejëmpl sön le dovëi da avëi n passaport, n visum, sön les assiguraziuns che vá debojëgn, sön les variores obligatories y sön d'atres formalités. De plü informaziuns sön chësc argomënt ciafëise sot a.

IADI

I consëis dla ZCE por n turism ecocompatibl

Vire te na manira sostignibla y cosciënta. Ciaré da smendrí la pedia de Co2. Porté pro ala sconanza dl clima. Chësc é n bojëgn de tröpes porsones. Mo co vára pa da fá jí a öna döt chësc cun nosc bojëgn da jí en vacanza, da fá iadi y da se relassé? Al é n dilema a chël che al n'é nia tan saurí da ti dé na resposta. La Zentrala di Consumadus Europeica (ZCE) Talia ves dá n valgügn consëis sön süa plata web sön co fá da rodé le monn te na manira plü sostignibla.

COMERZ ELETRONICH

Medete averda ales trapolades online!

Che che ó trapolé d'atra jënt se fej gonot saurí te internet: ai s'invënta n'identité plausibla falza y sciafia da rové pro cënc sce nia milesc de euro de consumadësses y consumadus che ne pënsa gnanca a val' de te y mina da avëi da nen fá cun comerziantes y comerzianc de guant de marca, cun de dër mediadësses y mediadus de produc finanziars, de dër proprietares y proprietars de apartamënc adinfit y pornanche ai röia pro i scioldi sparësci. Denant che azeté n'oferta, mené inant dac personai o fá n paiamënt danfora él dagnora damí da ciaré do cun che che an stlüj jö le contrat, sce an conësc bëgn düc i dac de contat dla porsona dal'atra pert y sce ara se trata de n'aziënda o de na porsona privata. Liede sön la plata web dla ZCE a ci che al é ciamó da mëte averda.

CAJE DL MËIS
De merz dl 2021 â na consumadëssa taliana aposté da na botëga online todëscia n box d'amplificaziun. De setëmber dl 2021 indere âra albü problems impara y insciö ti âra fat na reclamaziun por scrit ala botëga, sciöche al vëgn preodü dala lege. Chësta s'á fat mené derevers le produt, l'á cuncé y ti l'á indô mené ala consumadëssa. Do da n valgügn mëisc âra indô avisa i medemi problems. La consumadëssa á indô contaté l'aziënda che ti á ciamó n iade cuncé le box d'amplificaziun. De novëmber dl 2022 ne jô le box bele indô nia. Deache al ê bele gnü porvé dui iadi da cuncé l'amplificadú ti á la consumadëssa damané ala botëga che le box gniss sostituí cun n aparat nü o che al ti gniss retü i scioldi dl prisc de cumpra. Mo indere l'aziënda n'orô nia n'un savëi. Insciö s'á la consumadëssa adressé ala Rëi dles Zentrales di Consumadus Europeiches (ECC-Net) por fá avarëi sü dërc tl ciamp dla garanzia legala (sostituziun o retüda). L'aziënda á odü ite i argomënc dla ZCE Germania y ti á retü le prisc de cumpra ala consumadëssa.