Verbrauchertelegramm Europa-Ausgabe Nuvëmber 2023

Beilage zur ladinischen Europa-Ausgabe Nr. 87 - Redaktion: Europäisches Verbraucherzentrum


PACHEC TURISTICS

Vera y tëma te Israel – Ci n'él pa de mie iade?

Le codesc dl turism prevëiga la poscibilité da se trá zoruch debann tl caje de situaziuns nia da schivé y straordinares, che vëgn a se le dé tl post de destinaziun o atira dlungia y che influenzëia cotan le iade o le trasport de passajiers devers dla destinaziun. N sëgn important por araté che al sides danman condiziuns ezezionales che influenzëia cotan le iade é - ince sce al n'é nia la condiziun fondamentala - n avis ofizial dl Minister di afars cun l'ester. Les zitadines y i zitadins dla Talia che á aposté n iade por Israel o i Paisc dlungia, ciafa dötes les informaziuns importantes sön le sit dl Minister di afars cun l'ester: www.viaggiaresicuri.it. Sce an consultëia la scheda dl Paisc olache an ó jí ciafon i avisc de segurëza spezifics y i consëis por chël Paisc. De plü informaziuns sön l’argomënt ciafon sot.


CONCURS ImagineEU

Ci mudassess pa ion dla legislaziun dl’UE?

Cun le concurs ImagineEU ti pita l’UE ala jonëza n’oportunité por presenté – sot forma de video - sües idees sön valch che podess gní mioré te süa comunité o te so Paisc y che podess deventé na lege te döta l'Uniun europeica. Le concurs é davert ai studënc y ales studëntes di ultimi dui agn dl'istruziun secondara/scora alta de düc i Paisc dl'UE. Sot ala suravijiun dl personal insegnant, pól tó pert grups de alplü set studënc y studëntes presentan so video cina ai 13 de dezëmber dl 2023. An davagna n iade de stüde a Bruxelles a ti ciaré a sües istituziuns dai 21 ai 23 de merz dl 2024. Por de plü informaziuns.


INFLUENCER MARKETING

N stromënt nü por schivé pratiches comerziales nia coretes

I influencer presënc sön les plataformes soziales desvalies é n fenomen economich tres plü important. Sovënz feji retlam por produc y sorvisc pro i consumadus y les consumadësses che ti ciara – i followers – y ince ëi, sciöche düc i operadus economics tl’UE, mëss respeté les normes che scona i consumadus. Avisa ai influencer y a che che cheriëia contignüs ti él gnü dediché la plataforma nöia dla Comisciun Europeica Influencer legal hub, che contëgn informaziuns sön la legislaziun dl’UE en materia de pratiches comerziales iüstes cun l'obietif da i informé sön les normes che mëss gní respetades.

CAJE DL MËIS
Na consumadëssa austriaca che á demënza y é sotmetüda a proteziun é gnüda contatada al telefon da n'aziënda taliana y á comané, tratan na telefonada de retlam, produc talians por zirca 100 euro. Impormó canche la fia dla consumadëssa detlarada legalmënter nia bona da agí á ciafé adinfal n’anotaziun tla tascia de süa uma, án ciafé sö che n vijin â odü le poch dlungia porta, â informé le curier dles condiziuns dla consumadëssa y â fat fora cun la dita de spediziuns che ara s'ess instëssa cruzié da gní a do le poch te n local comerzial. Porimpó n'é le poch nia gnü tut zoruch y la marcianzia é intratan jöda ademal. Ince sce la fia dla consumadëssa â spezifiché la situaziun de incapazité de süa uma y dl'invalidité dl contrat, â la sozieté orü che al gniss paié i produc. Y avisa da iló inant s'á la Zentrala di Consumadus Europeica (ZCE) Talia cruzié da ciafé na soluziun, do che la ZCE Austria â damané aiüt. Ince la consulënta legala dla ZCE Talia â naota ciafé n feedback negatif dal’aziënda de venüda, che sotrissâ che la soma n'ê nia gnüda paiada. Implü n’â le venditur nia tigní cunt dles lamentanzes por avëi cherdé sö la consumadëssa zënza che al foss gnü damané. Impormó canche la ZCE Talia â fissé n ultim termin por la presentaziun de na spligaziun sön l'adoranza nia autorisada di dac personai á l'aziënda lascé alsavëi che al n'ê nia plü da paié.