Verbrauchertelegramm Europa-Ausgabe mà 2015

Beilage zur ladinischen Europa-Ausgabe Nr. 35 - Redaktion: Europäisches Verbraucherzentrum


ADI Y VACANZES

En vacanza cun n clich – Ci ch'al é bun da savëi sc'an prenotëia online

Al basta n clich por stlüje jö n contrat de iade online. Pro chësta sort de contrac ne vëgnel de regola nia odü danfora ch'an po se trá derevers debann: le dërt de retrata por i sorvisc tl setur dl alojamënt y dl tëmp lëde vëgn stlüt fora categoricamënter, sce le contrat prevëiga na data spezifica o n tëmp determiné por l'esecuziun de chisc sorvisc. Che che oress porchël anulé n iade cun döt lapró, mëss dessigü fá cunt cun le paiamënt de na tassa de storno che devënta tres majera, plü dlungia che le dé dla partënza röia. Implü nes comunichëia tres plü porsones che ares á fat adinfal la prenotaziun online de dui iadi, deache la pröma confermaziun dla prenotaziun é rovada automaticamënter sot ai SPAM dl e-mail zënza ch'ares s’un ess intenü. Ince d'atres comunicaziuns importantes dl portal de iade va a finí bindicé sot ai spam: porchël controlede regolarmënter ince i spam dles e-mails! Por de plü informaziuns, consëis y assistënza jide sön nosta plata internet .


COMERZ ELETRONICH Y CONSUMADUS

Barat d'esperiënzes danter la Zentrala di Consumadus Europeica (ZCE) y la Polizia Postala da Balsan

Les cumpres online é tl'Uniun Europeica bele dî na cossa da vigni dé; al vëgn sciazé che ma tla Talia él 14 miliuns de cumpradësses y cumpradus online. Ara se trata de n fenomen che crësc tres ciamó, che pîta tröc vantaji y che fej oramai pert dla vita da vigni dé de tröc de nos. An mëss indere danz mëte dër averda y ester cosciënc de düc i prighi por schivé de burtes conseguënzes. Le sceticism ti confrunc dla segurëza di mesi de paiamënt á porté a convinziuns falades, é pö le paiamënt bancar gnü conscidré por tröc agn n stromënt de paiamënt sigü, mo oramai n'éra nia plü insciö. De plü informaziuns che reverda chësta incuntada é da ciafé sön nosta plata internet .


Assistënza al ester: ecuiparaziun por les zitadines y i zitadins dl'UE

Les diretives europeiches nöies regolamentëia la proteziun consolara sura döt le monn

Sc'an é en vacanza al ester y an se perd le passaport, an vëgn derobá, an á n inzidënt o an röia cinamai te na situaziun de prigo, sciöche na catastrofa naturala, spo pón s'adressé ales autorités consolares che rapresentëia nosc Paisc te chël teritore olach'an é. Mo ci sozedel pa sc’al n'un é degönes te chël post? Na diretiva europeica nöia á sëgn stlarí la chestiun. Nia vigni stat dl'Uniun Europeica n'á te vigni Paisc na süa ambasciada o n so consulat. Cun chësta diretiva vëgnel stabilí che les zitadines y i zitadins dl'UE, che é sön le iade te n Paisc terzo olache al n'é nia na süa ambasciada o n so consulat, á le dërt da ciafé proteziun consolara dai atri Stac dl'UE. De plü informaziuns podëise ciafé por inglesc sot a europakonsument.at.

Caje dl mëis

Da d'altonn dl 2014 s'á n consumadú franzesc lascé gní da na plata internet taliana na roda da munt che costâ 700 euro. Ince sce la roda ê fata ia indortöra y l'injop n'ê nët nia roviné s'á le consumadú intenü pornach'al á despochené fora la roda che sön la cornisc êl n'arissada sota de 2 cm de lunghëza. Al messâ ester che le dann foss gnü a s'al dé bele denant che la roda gniss fata ia y menada demez. Le cumpardú á sön na tara atira informé le venditur dl dann ala roda y ti á ince mené fotografies dl dann y dl injop nia roviné. Impede tó zoruch y ti baraté la roda ti á l'aziënda pité n bon de 50 euro. Porchël á le consumadú contaté la Zentrala di Consumadus Europeica Francia che á damané do l'aiüt dla Zentrala Consumadus Europeica de Balsan. Chësta á tut sö contat cun le venditur. Impröma él sté n pü' n ia y ca, mo spo éra jüda da arjunje la restituziun dla roda arissada y al consumadú ti él gnü rembursé döt le prisc dla roda da munt.