Verbrauchertelegramm Europa-Ausgabe Merz 2015
Beilage zur ladinischen Europa-Ausgabe Nr. 21 - Redaktion: Europäisches Verbraucherzentrum
E-COMMERCE
Safer Internet Day
Por ći che reverda le problem dles mitans y di mituns cun l'internet é i geniturs dan na gran sfidada, dantadöt canch'ara nen va da acompagné sües mitans y sü mituns che mët man da d'adorè chësc medium y da i eduché a l'anuzé indortöra. Le Safer Internet Day ai 10 de forà é porchël stè na buna ocajiun por tröc geniturs da gnì cosciënć de chësta problematica.
I prighi por mitans y mituns, jones y jogn é dër desvalis y i ćiamps tematics cun chi che la Zentrala di Consumadus Europeica se dà jö é da nia en confrunt, deach'ara nen va pö "ma" ala fin fin de contrać stlüć jö dales mitans y dai mituns cun l'inom di geniturs, de imporć trać jö dala cherta de credit, de plates internet che é trapolades y de jüć da davagné falc. De
plü informaziuns ciafëise sön nosta plata internet.
ZCE
Sport & consumadus
De forà à 35 studënć da 20 paîsc desfarënć tut pert ala "Winter Law School" metüda a jì da ELSA, l'assoziaziun europeica di studënć de dërt, tl'Université da Desproch. La manifestaziun ê dedicada al dërt dl sport. Sciöche referënta él inće gnü invié Monika Nardo, consulënta legala dla ZCE de Balsan. A pröma odlada pêl che le coliamënt danter dërt dl sport y dërt di consumadus sides valgamia dalunc, mo Monika Nardo spliga che la iurisdiziun taliana arata bele da dezenns i atleć sportifs amatoriai sciöche consumadus y da chësc vëgnel conseguënzes importantes. De plü informaziuns ciafëise sön nosta
plata internet .
MEDIAZIUN DE PARTNER
Cörs solitars
Al é feter na tradiziun por la Zentrala di Consumadus Europeica (ZCE) da fà n bilanz, en gaujun dl dé de San Verentin, tl setur dles retlamaziuns por ći che reverda les agenzies de mediaziun de partner. I numeri é consolanć: Les domandes d'informaziun y les retlamaziuns é gnüdes plü rades. Co se lascia pa splighé na reduziun tan drastica? A chësc à dessigü portè pro na mudaziun dl'oferta te chësc setur: aldedaincö abìnon tres plü gonot agenzies online che é normalmënter cotan manco ćeres. Implü él dessigü inće na faziun dl'ativité d'informaziun dla ZCE. A vigni moda ti pîta
nosta plata internet a dötes les porsones che à intenziun da ciafè so partner ideal tres n'agenzia de mediaziun na gran varieté de informaziuns y consëis pratics.
Caje dl mëis
Laûrs de manutenziun straordinara te n'abitaziun porta dagnora pro a n pü' de stres. De chësc â na consumadëssa che â tu la dezijiun da baratè fora dötes les finestres y na porta de sorà de süa abitaziun bëgn tignì cunt. Ara â contatè n rapresentant de na firma austriaca y ti metô sön le cunt na soma nia da püch sciöche acunt. Tl scomenciamënt âl dè ca n valgünes dificoltês por ći che reverda i tëmps de consegnaziun, mo le peso â ćiamò da gnì: les finestres ne gnô nia metüdes ite cun profescionalité, le funz de parchet gnô roviné dai montêrs y le vider dl üsc de sorà gnô sfenü tratan i laûrs d'instalaziun. Sön na tara ti à la consumadëssa atira scrit na lëtra racomanada cun avis de recioiüda, cun laprò inće fotografies di dagns gaujà, ala firma che respognô zënza impormetüdes concretes da orëi refà i dagns. Insciö à la consumadëssa contatè la ZCE de Balsan che ti à menè inant le caje ai colegs dla ZCE Austria. Les tratatives à doré n ann intier, do da chël che al é gnü arjunt resultać positifs: al é gnü refat i dagns pro les finestres, l'üsc de sorà é gnü baratè fora y inće dötes les atres manćianzes é gnüdes tutes y jüdes. Y ćiara madër: al ti é inće gnü menè adalerch döta la documentaziun che la consumadëssa adorâ por podëi damanè por tëmp les alisiraziuns fiscales preodüdes dala lege.
