Verbrauchertelegramm Europa-Ausgabe Auril 2015

Beilage zur ladinischen Europa-Ausgabe Nr. 28 - Redaktion: Europäisches Verbraucherzentrum


IADI Y VACANZES

Inzidënt sön la pista da schi foradecá – Canche n fligher po gní cër

Che che é tl laur da pié ia y jí foradecá dess se damané sce al é assiguré sciöche al alda sce al ess da fá n inzidënt sön pista. Por ejëmpl n intervënt cun le fligher po costé ince n valgügn milesc de euro! La Tessera Europeica Assiguraziun Maratia (TEAM) se dá scê le dërt da gní curá sce al va debojëgn te na strotöra publica tratan che i sun foradecá, mo ales medemes condiziuns di zitadins y dles zitadines dl Stat olache i sun y nia ales condiziuns che vel te nosc paisc. Tignide ince cunt che sce i ne sëis nia bugn da gní a ciasa da susc y i messëis gní acompagná, ne vëgn chisc cosć nia curis dala TEAM. Porchël él dagnora important da controlé sce an é bëgn assigurá assà. De plü informaziun é da ciafé sön la plata internet dla Zentrala di Consumadus Europeica (ZCE).


DËRT DI CONSUMADUS

Vel les garanzies comerziales ci che ares costa?

Por tröc produc ciafa i consumdus aldedaincö debann y automaticamënter na garanzia dal produtur. Dlungia chësta garanzia comerziala él la garanzia legala europeica che ti conzed ai consumadus da damané, de regola te 2 agn dala cumpra, che le produt da defet vëgnes cuncé o baraté fora, o te n valgügn caji, che al ti vëgnes retü i scioldi. Ciodí pa spo cumpré na garanzia comerziala implü? Paiël la mëia da la cumpré? La Rëi dles ZCE dëida capí i consumadus sce al se trata de na garanzia che va bun. Por mirit dles checklists arjignades ca dala Rëi dles ZCE, po i consumadus cumpré ite sciöche al alda. Döta la relaziun, n so ressumé y les checklists é dan man por inglesc. Sön la plata internet dla Zentrala di Consumadus Europeica (ZCE) da Balsan él dan man na brosciüra sön la garanzia legala tla Talia y ti atri Paisc dl'UE.


Caje dl mëis
Na copia taliana â aposté n’edema de vacanza te n hotel dlungia n bel lech dl Paiern. A öna cun l’ostira âra paié ite damperfora püch denant co pié ia 1.200 euro por la sojornanza. Mo n iade rová dailó âra messü paié ciamó n iade le cost dl hotel ajache al ê mudé l’ostí. L’ostira da denant ê jüda ala nia y le ostí nü n’â ödü gnanca n euro dla soma paiada ite dal per talian. I turisć á messü paié ite ciamó n iade la soma. I consumadus é stà bugn da ciafé sö le curadú falimentar che i á desgort debota dijon che la soma che ai â paié ne fajô nia pert dla massa falimentara. Do n ia y ca lunch y sfadius danter i consumadus y la banca dl hotel che n’orô nia paié la soma ajache aladô d’ëi manciâl na basa iuridica por la retüda, é i consumadus jüs dala Zentrala di Consumadus Europeica (ZCE) de Balsan che á damané aiüt ai colegs dla ZCE Paisc Todësc. Do che la banca â naôta tl pröm desdit da paié, é i colegs todësc jüs dal curadú falimentar, che á conzedü ala fin por scrit la retüda dla soma … y finalmënter á i consumadus podü programé na vacanza nöia cun la soma ciafada!