Verbrauchertelegramm Europa-Ausgabe Utober 2022

Beilage zur ladinischen Europa-Ausgabe Nr. 78 - Redaktion: Europäisches Verbraucherzentrum


COMERZ ELETRONICH

Él rové i tëmps olache an podô mené derevers debann?

Cun la chersciüda costanta dles cumpres online él sambëgn ince jü sö le numer di produc che vëgn mená indô derevers, plü avisa le numer dles porsones che s'anüza dl dërt da ponsé ciamó n iade sura. N valgönes de gran aziëndes indere, dantadöt tl setur dl guant, á scomencé da ti araté a süa clientela te n valgügn Paisc europeics les spëises de restituziun di produc, che ê cina sëgn feter dagnora debann. Chësta mudaziun de strategia dl comerz eletronich rapresentëia n desvantaje economich por les consumadësses y i consumadus, dantadöt por la generaziun plü jona, ausada bonamënter da cumpré ite online so guant te na manira plütosc naturala, sfrutan sambëgn la poscibilité da podëi mené zoruch i produc indô debann. Mo al pó ince ester na bona ocajiun por ponsé ciamó n iade sura sön les usanzes da cumpré ite online che an á, ciaran da cumpré ite te na manira plü cosciënta por amur dl tacuin y dl ambiënt. De plü informaziuns...

IMPRËST D'AUTI

Le 55% di portai de intermediaziun ne respeta nia i dërc dles consumadësses y di consumadus

Les autorités por la sconanza dles consumadësses y di consumadus de diesc Stac comëmbri y dla Norvegia á fat na ligna de controi (“sweep”) sön 78 plates web che intermediëia imprësć d'auti, cun lapró ince i portai de prenotaziun generai y les plates web dles compagnies de jore. Ma le 45% de chëstes plates web ti corespognô ales normes dl'UE tla materia de sconanza dles consumadësses y di consumadus.
Sön n terzo dles plates web n'êl degönes informaziuns tleres sön che che les consumadësses y i consumadus podess contaté tl caje de domandes o reclamaziuns: l'intermediadú o la sozieté d'imprëst d'auti? Prësc mec ne dê gnanca informaziuns tleres sön ci che ê o ne ê nia pro l'assiguraziun. Implü ne dê le 27% dles plates web nia dant tlermënter la denominaziun dl sorvisc de intermediaziun, pro le 32% n'êl nia sigü che che foss avisa vincolé dales condiziuns de imprëst, l'intermediadú o la sozieté d'imprëst d'auti, y inultima selezionâ le 21% bele danfora sorvisc a paiamënt che ne mëss nia ester.

PRATICHES COMERZIALES INGIANOSES

Sëgn vára plü saurí da desdí l'abonamënt a Amazon Prime

La Comisciun europeica á lascé alsavëi che Amazon á azeté da mudé süa prozedöra de desdita por jí a öna cun les normes dl'UE tla materia dla sconanza dles consumadësses y di consumadus, dantadöt chëres che reverda les pratiches comerziales nia coretes. Tl dagní bastarál dui clics por desdí l'iscriziun a Amazon Prime clican sön le botun "Cancel", tler y saurí da odëi. Cina sëgn messâ les consumadësses y i consumadus naota ciaré da s'intopé sön la plata web danter menü de navigaziun complicá, formulaziuns püch tleres, poscibilités da chirí fora confuses y tecniches de “nudging” insistëntes (strategies che vëgn adorades por influenzé le comportamënt dles consumadësses y di consumadus)

CAJE DL MËIS
Canche na consumadëssa residënta tl'Austria â prenoté tl scomenciamënt dl 2020 na vacanza de n valgügn dis te n hotel a Jesolo por la fin de ma, ne podôra ciamó nia s'imaginé che al foss sté n lockdown y cun chësc na proibiziun da se sposté por fins turistics che ess tigní pro por tröpes edemes alalungia, tan che al ne foss nia plü sté poscibl da arjunje la localité de vacanza. La consumadëssa á insciö messü desdí la prenotaziun y á ciafé, impede i scioldi, n bon che valô n ann sciöche al ê porater preodü inlaota dales normes d'emergënza. Mo sciöche i savun ne s'á l'emergënza gaujada dal Covid nia rové dl 2021 y la consumadëssa n'á nia sciafié da adoré le bon denant che al tomass. Canche ara orô prenoté süa vacanza d'isté dl 2022 ára ciamó n iade contaté la strotöra a Jesolo mo al ne ti é nia gnü conzedü da d'adoré le bon deache, da sciöche le hotel dijô, êl bele oramai tomé. La Zentrala di Consumadus Austria ti á mené inant la reclamaziun dla consumadëssa ala ZCE Talia che á contaté la strotöra y ti á splighé che la dorada di bons Covid ê gnüda arlungiada bele plü iadi tres lege: naota a 18 mëisc, spo a24 y inultima a 30 mëisc, y sce an ne s'anüza nia de chësc, él l'oblianza da rete i scioldi te 14 dis. L'hotel ne ess porchël nia podü refodé le bon por na prenotaziun nöia. Do l'intervënt dla Zentrala di Consumadus Europeica á la strotöra dé pro le fal y ti á retü düc i scioldi dl bon ala consumadëssa.