Verbrauchertelegramm Europa-Ausgabe Jená 2022

Beilage zur ladinischen Europa-Ausgabe Nr. 7 - Redaktion: Europäisches Verbraucherzentrum


GARANZIA LEGALA
Al vá en forza regoles nöies
A düc i bëgns de consum cumprá pian ia dal 1° de jená dl 2022, ti vëgnel apliché les regoles sön la garanzia legala nöies portades ite cun l’atuaziun dles diretives UE 2019/770 y 771. Por le pröm iade vëgnel regolamenté esplizitamënter tl Codesc dl Consum ince les fornidöres de contignüs y sorvisc digitai: nia ma chi che an á paié, mo ince chi pitá debann “paiá” cun i dac. La dorada dla garanzia legala romagn anfat (dui agn), mo al n’é nia plü preodü che le consumadú denunziëies la mancianza te dui mëisc dala descurida; le termin por la presunziun che la mancianza foss bele al momënt dla surandada se slëria fora a n ann dala surandada dl bëgn (cina sëgn ê le termin de 6 mëisc). Les regoles nöies é contignides ti articui 128 – 135 vicies ter dl Codesc dl Consum.


ROAMING

Tl’UE vá inant le “roam like at home”

De bones noeles por che che roda tl’UE: an podará inant adoré le fonin por telefoné, ortié SMS y adoré internet zënza cosć surapró y cun la medema cualité che an á a ciasa altamo cina le 2032. Al é gnü ciafé n’acordanza danter le Consëi, la Comisciun y le Parlamënt europeich. De plü informaziuns sön le roaming tl’UEciafon chiló.


E-COMMERCE

Co ciafé sö trapolades canche an cumpra online

Dan da püch á la ZCE registré n aumënt de domandes d’informaziun sön les ofertes de auti de secunda man te internet che é spo ala fin trapolades. Baldi damanon te chisc caji sovenz n consëi canche al é massa tert y an á bele albü n dann economich. I sic web trapoluns clonëia l'identité de de dërc conzescionars d'auti: i dac de contat dá dant ti corespogn a chi che la dërta aziënda á de jö pro la Ciamena dl Comerz. Por i consumadus él insciö ri da ciafé sö les trapolades. La ZCE ves spliga co fá.


CAJE DL MËIS
De jená dl 2020 á na consumadëssa taliana aposté de plü jori lunc tres na plataforma online ingleja paian passa 1.500 euro. D’aisciöda dl 2020 é i jori gnüs straicá porvia dl Covid-19 y la plataforma online ti á confermé ala consumadëssa che la domanda de retüda ti ê gnüda ortiada inant ala compagnia de fligri. La plataforma ti á porchël damané ala consumadëssa da avëi paziënza, dijon che ai ê tl laur da ciafé la retüda da pert dla compagnia. D’altonn dl 2021 á la consumadëssa contaté diretamënter la compagnia de fligri. Chëst’ultima á dit che la domanda de retüda ê gnüda menada inant dala plataforma online impormó de messé dl 2021 y che la compagnia ne sciafiâ nia da la lauré fora, ajache ara ê gnüda dada jö damat. La consumadësssa á porchël contaté la ZCE Talia. Nosc Zënter á gestí la reclamaziun en colaboraziun cun la ZCE dl Rëgn Uní y ala conumadëssa ti él spo gnü retü, do che i colegs s’â cruzié, la soma intiera dles chertes de jore.