Verbrauchertelegramm Europa-Ausgabe Merz 2022

Beilage zur ladinischen Europa-Ausgabe Nr. 23 - Redaktion: Europäisches Verbraucherzentrum


SAFER INTERNET DAY

5 consëis por na majera segurëza sön Internet

En gaujiun dl Safer Internet Day che é sté ai 8 de forá unse publiché 5 consëis por navighé sön Internet cun na majera segurëza. 1. Ne stede a mëte informaziuns online che i n'orëis nia che düc sais. 2. Ne stede a respogne ai messaji tres chat o ai comentars de porsones che ves tichinëia o ves destürba. Blochedeles y segnaledeles ales autorités. 3. Sce i sëis vitimes de cybermobbing, ne stede a ves sintí en colpa; i ne sëis mai os de gauja! 4. Sce i cumprëis ite valch online controlede dagnora cun che che i stlujëis jö le contrat de cumpra. 5. Anuzesse de mesi de paiamënt sigüsc y che vá da ti jí do. De plü consëis é da ciafé sot a: https://www.euroconsumatori.org/it/news_it/721.

CHIRÍ SCINCUNDES ONLINE

Co fejon pa da les chirí fora zënza risćé da gní trapolá?

Canche an ó scinché valch pënson d'istint ala reaziun dla porsona che ciafará la scincunda. Mo tl momënt che an cumpra valch paiel la mëia da se conzentré y ponsé n pü' sura. Sce ara vá schivede les plates web de dropshipping por ne risćé nia da messëi aspeté dër dî a osc poch, ciafé produc de cualité bassa o messëi paié tasses doganales che n'ê nia gnüdes dades dant. Implü él da se recordé che sce i comanëis na scincunda personalisada o n sorvisc dl tëmp lëde por na certa data ne podëise nia s'anuzé dl dërt de retrata de 14 dis. Por de plü informaziuns: https://www.euroconsumatori.org/it/news_it/723.

FÁ N IADE TL TËMP DE CORONA

Ciafon na retüda di scioldi sce le iade vëgn desdit?

Ti ultims agn n'él nia sté saurí da organisé na vacanza. Mo sëgn pél che an mëtes man da odëi na löm ala fin dl tunel dl coronavirus, ince sce al pó tres ciamó sozede che döt vëgnes desdit al ultim momënt propi porvia dl covid. Sce por os ne vára ogetivamënter te degöna manira da s’anuzé dla prenotaziun porvia dl coronavirus él por fortüna almanco tla Talia le dërt de retüda. Al é madër important che le resultat positif dl test vëgnes cumprové da n test PCR o antigenich fat da personal sanitar y nia da n test nasal che an pó se fá instësc. Mo metede averda: al ne vëgn nia preodü na retüda te düc i caji... Por de plü informaziuns jide sön https://www.euroconsumatori.org/it/news_it/725.

CAJE DL MËIS
Na consumadëssa taliana â tut n sorvisc de transfer de n'aziënda de bus todëscia por rové da süa cité cina a n aeroport che ê a zirca 3 ores de destanza y da olache ara ess messü tó le fligher. Do da passa döes ores de iade orô la consumadëssa jí sön le cagadú che ê te bus mo ara gnô sura che al ne jô nia. Insciö ára damané le ciafer sce ara ess podü jí pro la proscima fermada. La consumadëssa se spazâ mo canche ara gnô zoruch dal cagadú ê le bus bele indô pié ia, sambëgn ince cun sü cufri. Insciö ne ti restâl nia d'ater da fá che tó n taxi cina al aeroport olache ara é por fortüna ciamó stada bona da abiné sü cufri che ê romagnüs te bus. Sön na tara ára damané che la sozieté todëscia ti retess i cosć dl taxi, mo ara n'orô n’un savëi nët nia da paié valch cun la motivaziun che le ciafer á sambëgn orars da respeté y ne pó nia se tigní sö massa dî. Insciö s'á la consumadëssa adressé ala Zentrala di Consumadus Europeica (ZCE) Talia che ti á mené inant le caje ala ZCE Germania; chësta á contaté la sozieté y á alzé fora che aladô dles condiziuns generales dl contrat él te vigni bus a desposiziun na toalëta por i passajiers y che le dann é gnü gaujé propi dal fat che la toalëta te bus ne ê nia en funziun. Inultima á l'aziënda dé do y ti é gnüda adincuntra ala consumadëssa ti reton i scioldi dl taxi.