Verbrauchertelegramm Europa-Ausgabe Decëmber 2022

Beilage zur ladinischen Europa-Ausgabe Nr. 94 - Redaktion: Europäisches Verbraucherzentrum


COMERZ ELETRONICH

I consëis dla Zentrala di Consumadus Europeica por cumpré ite online te na manira sigüda

Deache i prisc é en general jüs sö vëgnel tres plü ciaré tan che val' costa canche al vëgn cumpré scincundes da Nadé te Internet. Mo iadô slogans sciöche "la miú garanzia di prisc" s'ascognel gonot impormetüdes che ne vëgn nia mantignides o cinamai trapolades y ingianades. Le prisc n'é nia dagnora veramënter gnü arbassé, ince sce al pé, les valutaziuns vëgn datrai falsificades y sce al mancia informaziuns che messes pordërt ester sön la plata web, sciöche por ejëmpl informaziuns sön la garanzia y le dërt de retrata, o informaziuns sön l'identité dl comerziant o la misciun dla botëga él damí da lascé ester y cumpré ite inzai d'ater. En gaujiun dl Black Friday á la Zentrala di Consumadus Euopeica (ZCE) publiché cin' consëis por cumpré ite online te na manira sigüda. Chisc vel sambëgn ince te dötes les atres ocajiuns.


INGIANADES ONLINE

Metede averda ales ofertes de pellets y lëgna

La crisa dl'energia ispirëia sciöche al pé ince jënt che ó ingiané te internet: al vëgn pité pellets y lëgna, do la rata bunmarcé, y al vëgn de regola ma azeté sciöche meso de paiamënt n trasferimënt de scioldi sön n cunt bancar. Datrai vëgnel cinamai adoré l'inom, la misciun y le numer de cuta söl valur ajunté de d'atres sozietés che esist davëi y insciö vëgnel dé l'impresciun che ara se trates de n'oferta sciöche al toca. Le patüc comané indere ne röia nia adalerch y i scioldi s'un é. Ince la ZCE á ciafé segnalaziuns de porsones che á pordü n valgügn milesc de euro por pellets comaná sön internet y mai gnüs consegná. Sciöche an pó reconësce y schivé trapolades online podëise lí sön la plata web dla ZCE.


LA ZCE SÖN I SOCIAL MEDIA

Ciamó deplü consëis y informaziuns sön nüsc canai

Savôse che la ZCE é ince sön i social media? Gnisse do sön nüsc canai social por ne se jomé nia ia un de nüsc consëis. I sun sön Instagram, sön Facebook y sön Twitter.

CAJE DL MËIS
N consumadú dl Belgio cun la pasciun dl afunsé ê sté en vacanza tla Talia. Mo sön so iade derevers ti él sozedü valch de desplajor. Por rové al aeroport s'ál anuzé de n sorvisc de na sozieté de bus. Sü trëi cufri, danter chisc ince n cufer cun döta l'atrezadöra da afunsé dër cera, ál metü iadedô tla lerch por i cufri dl bus. Impormó canche le bus ê bele da n pez sön le iade sön na strada bindebó da otes s'án intenü che n üsc dla lerch por i cufri ê davert. La tascia cun l'atrezadöra da sub ê tomada fora tratan le iade y é jüda a perde. Le consumadú ti á damané ala sozieté de bus le rembursamënt dl dann mo chësta ti á respognü che al messâ damané do pro l'assiguraziun. Mo ince chësta n'orô n'un savëi nia da ti paié le dann deache la cuota de partezipaziun ai cosć dla sozieté de bus ê massa alta. Le consumadú á insciö contaté la Zentrala di Consumadus Europeica tl Belgio che ti á mené inant le caje ala ZCE Talia. Chësta á fat n intervënt pro la sozieté de bus y é stada bona da fá tan che ara ti á paié al consumadú n'indenisaziun de 2000 euro.