Verbrauchertelegramm Europa-Ausgabe Setëmber 2022

Beilage zur ladinischen Europa-Ausgabe Nr. 71 - Redaktion: Europäisches Verbraucherzentrum


CAOS AEROPORC

I dërc di passajiers

Mancianza de personal ti aeroporc y pro les compagnies de fligri, tröc sciopri, alzada dla domanda da pert di passajiers do dui agn de pandemia: al é tröpes rajuns che á condüt al caos tl setur dl trasport cun le fligher che é gnü a se le dé tratan l‘isté 2022. Che che l’á porvé fora n’é nia zënza sconanza por mirit dl regolamënt UE 261/2004 sön i dërc di passajiers di fligri y dla Convenziun de Montreal. Le Regolamënt dl’UE 261/2004 prevëiga la poscibilité da damané do n trasport alternatif, retüdes, assistënza y te certes situaziuns ince na compensaziun de scioldi tl caje de intardiades, straicades y impedimënt da senté sö, deperpo che la Convenziun de Montreal prevëiga retüdes tl caje de pordüda, dann o intardiada di cufri. Por de plü informaziuns ciarede do sön la plata internet dla Zentrala di Consumadus Europeica (ZCE).


VACANZES ROVINADES

I modí de lëtres dla ZCE é a desposiziun

É le jore gnü straiché, ê la barca dër tardia o é le hotel n spavënt? La Zentrala di Consumadus Europeica á arjigné ca na ligna de modí de lëtres por daidé i consumadus y les consumadësses formulé sües reclamaziuns ti confrunc de strotöres alberghieres, operadus turistics, compagnies de fligri, sorvisc de navigaziun, dla ferata y di bus; les lëtres pó gní desćiariades debann sön la plata web.


ACCOUNT HACKERÉ?

Co se tó indô zoruch so profil Instagram

Tl ultimo tëmp él gnü hackeré tröc account de Instagram sciöche al pé ma clican sön n link: n profil cun chël che an é bele en contat, che é bele gnü hackeré, ortia n link tla chat invian a cliché lassura por les rajuns plü desfarëntes (da concursc de belëza a ocajiuns por davagné online…). N iade che an á cliché sön le link n’él nia tler coche le hacker ti röia pormez al profil dla porsona malcapitada y müda la password, a chësta moda ne ti röia la porsona trapolada nia plü pormez. N iade che le profil é gnü hackeré ne vára nia plü da surantó le control sön le profil. Mo sce al é sön le profil fotografies olache an se reconësc vára da tó indô posses dl account fajon n valgügn passaji. Liede co fá sön le sit dla ZCE.


CAJO DL MËNS
Na consumadëssa ê jüda dala ZCE Talia ajache ara â tut pert a na litiza online, gestida da n’aziënda olandeja, por cumpré dui ciavai: les ofertes plü altes gnô dala consumadëssa che s’á aiudiché trami dui i ciavai.
La consumadëssa n’ê nia sigüda dla cumpra ajache ara n’â mai odü i ciavai dal vi y ajache ara messâ organisé y paié instëssa le trasport tla Talia. Por chëstes rajuns ára eserzité le dërt de retrata: l’aziënda n’á indere nia azeté chësta detlaraziun. La diretiva sön i dërc di consumadus stlüj fora l’eserzize dl dërt de retrata sce an tol pert a na lizita publica. L’adoranza por la lizita de plataformes online metüdes a desposiziun da consumadus y profescionisć ne vëgn indere nia conscidrada na lizita publica aladô dla diretiva y porchël pól gní apliché le dërt de retrata a chësta sort de lizites online.
La ZCE Talia á ortié inant la pratica ai colegs dla ZCE Olanda y por mirit de so intervënt é la detlaraziun de retrata gnüda finalmënter azetada dal’aziënda.