Verbrauchertelegramm Europa-Ausgabe Juni 2022

Beilage zur ladinischen Europa-Ausgabe Nr. 46 - Redaktion: Europäisches Verbraucherzentrum

ONLINE TRADING INGIANUS

L'Europol arestëia 108 porsones che á trapolé

L'Europol, la polizia dla Letonia y dla Lituania é stades bones da desmascheré plü co cënt trapoluns che savaiâ da ester consulënc por le online trading, mo che fajô pordërt pert de n call-centre fraldorënt. Tl'ultima edema de merz â cënc de agënc dles forzes dla polizia, danter chëstes ince n valgönes scuadres speziales, fat razies te trëi call-centre che fajô düc trëi pert dl medemo grup criminal; sü mëmbri, de chi che al n'é gnü aresté 108, vëgn acusá da avëi trapolé porsones sura döt le monn. Chisc delincuënc cherdâ sö sües vitimes al telefon y les baiâ sö da investí te valütes cripto, valütes forestes y te stromënc finanziars desvalis y ti impormetô de gragn davagns. Mo i investimënc ê baldi ma na finziun: da fá insciö á les porsones sospetades che é gnüdes arestades davagné passa 3 miliuns de euro al mëis. Por de plü informaziuns sön le online trading: https://www.euroconsumatori.org/de/ecommerce_online_trading.

METEDE AVERDA ALES INGIANADES

Co se comporté por ne tomé nia te fufoles

Al vëgn tut en mira porsones de vigni eté, belanfat da olache ares vëgn, ci livel cultural che ares á o tan che ares davagna. Al n'é degun grup de porsones che á n'imunité cuntra ingianades. Dan da püch é zacotan de consumadësses y consumadus gnüs trapolá da na porsona che savaiâ da ester n mediadú de pëncs sportifs. Al impizâ sö sües vitimes fajon reclam sön i social media y ti garantî da s'anuzé de n sistem sigü por pëncs cun chi che an davagnâ: do che consumadësses y consumadus â paié ite somes de passa 20 mile euro n'ê chëstes nia plü da spié. D'atres porsones é gnüdes atrates da comunicaziuns tres e-mail o da finestres pop-up che parô gniss da aziëndes multinazionales che fajô reclam dla poscibilité da cumpré o vëne aziuns o produc finanziars coliá al andamënt dles aziuns de chëstes aziëndes. Tres chësc mediadú ingianus él gnü trasferí somes de scioldi ince de passa 15 mile euro. Tosc dedô sparî le mediadú tl nia. Implü gnôl ince fat reclam de app che ess messü garantí la segurëza dl pc ... mo che instalâ indere n program che conzedô da controlé le computer da dalunc y insciö jôra saurí da ti podëi pormez ales password y al pin dles chertes de credit. Por ne se lascé nia ingiané a na te moda liede nüsc consëis sön nosta plata web: https://www.euroconsumatori.org/de/news_de/764.

PROTEZIUN DI DAC

Na majera cooperaziun danter les autorités de verda europeiches

En conscidraziun dl'atuaziun dl GDPR (le Regolamënt general sön la proteziun di dac tl'Uniun Europeica) á les Autorités competëntes dla lerch economica europeica (SEE) tut la dezijiun da renforzé la cooperaziun sön n valgügn caji strategics. Le Comité europeich por la proteziun di dac (EDPB) á stabilí n valgönes diretives strategiches de chësc vers, sciöche por ejëmpl da individué deboriada y regolarmënter certi caji che vá sura i confins fora de importanza strategica che gnará trac dant dala cooperaziun cun le sostëgn dl Comité, da cherié n model europeich por la presentaziun de reclamaziuns che pó gní adoré volontariamënter y da potenzié i stromënc informatics a desposiziun dl Comité. De plü informaziuns é da ciafé sot a: https://www.euroconsumatori.org/de/news_de/768.

CAJE DL MËIS
De jená dl 2020 â na consumadëssa taliana prenoté por les vacanzes da Pasca na sojornanza te n hotel a Paris. Dailó ne podôra indere nia ciamó savëi che ara ne foss nia jüda da fá le iade porvia dl lockdown a gauja dl coronavirus. Impede ciafé derevers i scioldi ti gnôl scrit fora n voucher dal hotel: sciöche la Talia â ince la Francia metü sö na normativa che odô danfora l'adoranza de voucher por anulaziuns de sorvisc de iade porvia dl covid-19. La consumadëssa ess messü adoré le bon tl tëmp de 18 mëisc por n'atra prenotaziun; chësc n'â la consumadëssa nia podü fá deache la situaziun ê tres ciamó plütosc malsigüda. Ala fin dl 2021, do che al ê passé i 18 mëisc de validité dl bon, ára plü iadi damané che l'hotel ti retess i scioldi. Mo ara n'á mai ciafé na resposta ... Insciö ára contaté la Zentrala di Consumadus Europeica (ZEC) Talia. Por mirit dla colaboraziun danter la ZCE Talia y la ZCE Francia y por la contentëza dla consumadëssa éra jüda da fá a na moda che al ti gniss retü döt l'import.