Verbrauchertelegramm Europa-Ausgabe Utober 2024

Beilage zur ladinischen Europa-Ausgabe Nr. 78 - Redaktion: Europäisches Verbraucherzentrum


VACANZES

Al vëgn metü en funziun la Banca Dac Strotöres Rezetives (BDSR)

Tres plü gonot chir fora che che viagëia por sües sojornanzes ciases por vacanzes o val' de somiënt, ince tres i portai de apostaziun plü conesciüs (che é indere ma intermediars), mo al n'é nia dagnora tler sce la strotöra apostada vëgn afitada da n operadú profescional o da n soget privat. Sovënz ne vëgnel gnanca dit che che al é l'afitadú/afitadëssa. Sëgn él jü en forza la insciödita “Banca dac nazionala dles strotöres rezetives y di imobii afitá por n tëmp cört o por fins turistics (BDSR)”. An spera che la BDSR pois oghé da mioré la trasparënza, daidé i ghesć schivé trapolades y avëi les informaziuns che vá debojëgn por fá avarëi sü dërc, sce val' ne vá nia bun tratan la sojornanza.

E-COMMERCE

L'aplicaziun dles normes por la proteziun dl consumadú/dla consumadëssa ne tleca nia

I sconti proponüs dales botëghes online pón oramai ciafé döt l'ann. Les ocajiuns vëgn dagnora presentades sciöche sce an ne podess io ne nia se les lascé sciampé, mo al n'é nia dagnora saurí da capí sce al paia veramënter la mëia o nia. La Zentrala di Consumadus Europeica (ZCE) Talia - Ofize de Balsan y la Zentrala di Consumadus dl Südtirol (ZC) á fat n control a caje sön i maius sic de e-commerce, por odëi sce les normes sön les indicaziuns di prisc vëgn respetades. An n'é nia da ester contënc cun ci che an á ciafé fora cun chësta inrescida. Ma 9 dles botëghes controlades á dé dant sciöche al alda le prisc plü bas di articui apliché ti ultimi 30 dis dan la promoziun. Liede sön le sit dla ZCE ci che an á ciafé fora.

PRATICHES COMERZIALES INGIANOSES

Wizz Air se tol dant da ester plü tlera

L’Autorité Garanta por la Concorënza y le Marcé (AGCM) â bele dl 2023 metü man cun n prozedimënt ti confrunc dl vetur low-cost Wizzair por ci che reverda les informaziuns potenzialmënter ingianoses sön la prozedöra de check-in online y le cost dl check-in te aeroport. Dan da püch á le vetur presenté ci che al s'á tut dant: al á ciaré da dé dant al momënt dl'apostaziun a na moda tlera y visibla, che le check-in online debann vëgn fat tles 24 ores dan la partënza y alplü tert 3 ores dan la partënza, da dé dant bele canche an apostëia che ara vá da cumpré le check-in te aeroport por 15 euro y che sce an ne respetëia nia la tëmp por le check-in online debann costará le check-in te aeroport 40 euro. Implü s'â le vetur tut dant da ti rete ai cliënc y ales cliëntes che â retlamé danter le 2019 y le 2023 deache ai n'ê nia stá bugn da fá le check-in online y â messü paié le suraprisc te aeroport.

CAJE DL MËIS
Por n iade a Roma â n consumadú chirí fora n'abitaziun por süa familia sön na plataforma de intermediaziun irlandeja, l'apostan y la paian mëisc danfora. Pro le prisc aldîl ince na garanzia de apostaziun sigüda. Le de che al ê rové adalerch ti êl indere gnü dit che l'abitaziun n'ê nia plü desponibla y che i scioldi ê atira gnüs dá zoruch. Mo la familia ê zënza abitaziun y porchël â le consumadú contaté le sorvisc ai cliënc dla plataforma d'apostaziun descrion so problem. Ince sce la plataforma n'ê nia atira stada bona da ti chirí aslöm n'atra abitaziun ala familia, ti â la plataforma d'apostaziun impormetü da ti rete cina a na certa soma al consumadú por n'apostaziun te n ater hotel. Le consumadú â spo chirí na ciamena te n hotel por süa familia y messü spëne 400 euro deplü co ci che al â preodü. Spo ti âl ortié la fatura dl hotel ala plataforma, y ince sce al â damané do de plü iadi, ne ti êl nia gnü retü i scioldi. Do cater mëisc á le consumadú contaté la ZCE Talia y á damané assistënza. Le caje ti é gnü ortié ala ZCE Irlanda, che á contaté la plataforma d'apostaziun. Döes edemes dedô á le consumadú lascé alsavëi che al ti é gnü retü i scioldi.