Verbrauchertelegramm Europa-Ausgabe Ma 2024

Beilage zur ladinischen Europa-Ausgabe Nr. 39 - Redaktion: Europäisches Verbraucherzentrum

UE

Regoles nöies sön l’inteliënza artifiziala

Le Parlamënt dl’Uniun Europeica á dan da püch aprové la lege sön l'inteliënza artifiziala (IA). Cun les normes nöies gnarál proibí chës aplicaziuns de IA che manacia i dërc dla jënt. Danter chëstes él i sistems de categorisaziun biometrica basá sön les carateristiches sensibiles y le trá fora zënza bëgndî ciaré imajes de müses da internet o dales registraziuns di sistems de telecameres da n zircuit stlüt por cherié banches dac de reconescimënt dles müses. Al gnará proibí ince i sistems de reconescimënt dles emoziuns sön le post de laur y tles scores, i sistems de valutaziun dl comportamënt sozial, les pratiches de polizia de previjiun (sce basades ma sön la profilaziun o sön la valutaziun dles carateristiches de na porsona) y i sistems che manipolëia le comportamënt uman o s'anüza dles vulnerabilités dles porsones. Por de plü informaziuns.

GARANZIA

Ci dërc pói pa fá avarëi cun i produc recondizioná?

Tröpes porsones cumpra n aparat eletronich recondizioné, sciöche por ejëmpl n fonin. Chisc produc vëgn conscidrá produc de secunda man. La normativa prevëiga te chisc caji na garanzia de dui agn. Porimpó póra gní – y de regola vëgnel ince fat – smendrida a n ann. N valgönes plataformes online o val' comerzianc/comerziantes conzed da amplié chësta garanzia de ciamó n ann, mo a paiamënt. Te chësc caje n'un vára nia plü dla garanzia legala, mo de na garanzia contratuala: les condiziuns dla garanzia vëgn porchël regolades dal contrat stlüt jö y nia plü dala lege, y porchël pó i dërc che vëgn da chësc contrat ince gní sotmetüs a restriziuns. Liede sön le sit dla Zentrala di Consumadus Europeica (ZCE) a ci che an mëss mëte averda canche an cumpra produc recondizioná.

Metede averda ala trapolada

Metede averda ai fake shops sön i social

Al é tres de plü consumadus che ti damana aiüt ala ZCE, ajache ai á comané marcianzia reclamisada sön i social media, mo á ciafé n produt da na stleta cualité o cinamai na verjiun da fá la blëita impede le produt real che funzionëia. Sön le papier podess le consumadú/La consumadëssa te chisc caji fá avarëi le dërt de retrata y le dërt de garanzia y damané la retüda de ci che é gnü paié. Chësc n'é te chësc caje baldi nia poscibl: la plata sön i social n'é nia plü da ciafé, al numer de telefon adoré por l'ordin tres messaje o telefonada n'él plü degügn che respogn y sön le poch adoré por la surandada n'él degöna misciun. Ajache le paiamënt te chisc caji vëgn fat cun contrassëgn, ne vára nia da ativé le insciödit chargeback – la poscibilité da ti damané le storno dl paiamënt al gestur dla cherta de credit. La ZCE aconsiëia da cumpré ma da sic web che fornësc misciuns fisiches y e-mails, partida CVA verificabla y azetëia le paiamënt cun cherta de credit. De plü informaziuns sön co cumpré ite online en segurëza ciafëise chiló.

CAJE DL MËIS
Dui viajadus talians ê jorá cun na compagnia de fligri todëscia cina a Stoccolma, da olache ai orô jí inant cun so iade devers dla Lapponia. Mo sü cufri n'ê nia rová adalerch impara. Ajache al ne foss nia sté na buna idea da jí inant devers dl nord dl Cërtl Polar Artich al scomenciamënt de jená zënza guant da d'invern adaté y al foss sté dër cer da cumpré indô l'ecuipamënt, â i passajiers tut la dezijiun da arlungé süa sojornanza a Stoccolma de na nöt a na moda da podëi jí indô te aeroport le de dedô speran che sü cufri foss intratan rová adalerch. Y impaca âi podü jí a tó sü cufri te aeroport. Spo âi contaté la compagnia de fligri por damané la retüda dles spëises surapró da sté suranöt te hotel y de trasport devers dl aeroport. La compagnia di fligri â refodé la domanda, ajache aladô dla compagnia messêl ma gní retü tl caje de intardiada di cufri, ci che vëgn cumpré por l'emergënza. La ZCE Talia á spo partí le caje cun la ZCE Germania, ajache aladô dla Convenziun de Montreal che regolëia les chestiuns che reverda la responsabilité pro le trasport cun i fligri, mëss la compagnia de fligri rete i dagns gaujá da intardiades pro le trasport di cufri. La compagnia di fligri á ala fin tut la dezijiun da ti rete i scioldi ai viajadus.