Verbrauchertelegramm Europa-Ausgabe Decëmber 2024

Beilage zur ladinischen Europa-Ausgabe Nr. 94 - Redaktion: Europäisches Verbraucherzentrum


COMERZ ELETRONICH

Pón mené zoruch scincundes da Nadé cumprades online?

Che che cumpra sües scincundes da Nadé online sá che pro les cumpres online él de regola n dërt de retrata de 14 dis. Atenziun: nia dagnora n'él n dërt de retrata! Insciö n'él por ejëmpl degun dërt de retrata sön patüc fat sön mosöra y gnanca pro contrac che reverda le tëmp lëde, olache le sorvisc dess gní fat n cer de o n cer tëmp, sciöche por ejëmpl chertes por n conzert, pachec de vacanzes, jori ... N dërt de retrata n'él gnanca sce patüc fat ia é gnü daurí (p.ej. CD, DVD, jüc por cumputer). De plü informaziuns sön le dërt de retrata él da ciafé sön la plata internet dla Zentrala di Consumadus europeica (ZCE).

JORI

Ryanair ret i cosć extra por le check-in te aeroport

L'Autorité garanta por la concorënza y le marcé (AGCM) á dan da püch stlüt jö n prozedimënt por pratiches comerziales nia coretes ti confrunc de Ryanair.
Ryanair s'á impegné da ti rete i scioldi dl cost por le check-in tl aeroport a consumadësses y consumadus che á fat na reclamaziun ala sozieté danter le 2021 y le 2023 deache ai n'ê nia a conescënza dles condiziuns che gnô aplicades al check-in online. Implü ciafa dötes les porsones, che á tla medema spana de tëmp prenoté n jore y paié le check-in tl aeroport, n rembursamënt de 15 euro o scenó n bonn da n valur de 20 euro. Al gnará ince mudé les modalités de seleziun dl’opziun por priorité y cufri a man, por che an pois chirí fora separatamënter le sorvisc che an ó sön le iade da jí y da gní. Les passajieres y i passajiers che á fat na reclamaziun de chësc vers ciafará n rembursamënt. Por deplü informaziuns.


E-COMMERCE

Temu sot la linsa de ingrandimënt dla Comisciun europeica

La Comisciun europeica y la Rëi CPC inresc do sce la plataforma de e-commerce Temu é jüda cuntra la legislaziun europeica sön i sorvisc digitai (Digital Services Act, DSA). Ara nen vá de violaziuns poscibles sot a deplü aspec, sciöche por ejëmpl dé da crëie che ara se trates de prisc de aziun, mëte sot a presciun por che al vëgnes stlüt jö na cumpra, deache al n'é ma püc toc, la "gamification" sforzada (chël ó di che l'azes ala plataforma vëgn adaldé tres n jüch dla roda dla fortüna, pro chël che al vëgn ascognü ia informaziuns essenziales sön les condiziuns d'adoranza liades al davagn dl jüch), informaziuns ingianoses sön i dërc dles consumadësses y di consumadus, rezenjiuns falsificades y informaziuns de contat ascognüdes. Sëgn á Temu la poscibilité da respogne y da formulé impëgns. Sce al é le caje risćiëia la plataforma straufunghes. Deplü informaziuns sot a.

CAJE DL MËIS
N consumadú talian â tut fora 250 euro pro n bancomat tl'Austria. Da fá chësc ne ti él nia ma gnü araté 2,90 euro da süa banca taliana, mo ince la banca austriaca ti á trat jö dal cunt 4,50 euro. Le consumadú á confronté la banca austriaca cun chësta cossa y ara ti á respognü che por prelevamënc cun na cherta estera calcolëiera avisa chë soma. Ajache al n'ê indere nia contënt dla resposta ál contaté la Zentrala Consumadus europeica (ZCE) Talia damanan sce chësta suratassa, che sciöche al pé vëgn ma aplicada a titolars de cunc da foradecá, sides bëgn legitima. Y belavisa se tratera de na violaziun dl prinzip de parité de tratamënt tles operaziuns de paiamënt, sce chësc import vëgn ma apliché sön les chertes esteres y nia sön chëres de porsones dl'Austria canche ares tol fora scioldi. Sön na tara á la ZCE Austria contaté la banca, che á detlaré che ince la clientela austriaca mëss paié chësta tassa, porimpó él demorvëia che ara é atira stada a öna da ti rete i 4,50 euro al consumadú. Ince sce ara se á traté de na picia soma tl caje singul, él sté dër important da sostigní le consumadú te süa domanda ti don a chësta moda pëis al prinzip de parité de tratamënt tles operaziuns de paiamënt europeiches.