Verbrauchertelegramm Europa-Ausgabe Forá 2024

Beilage zur ladinischen Europa-Ausgabe Nr. 14 - Redaktion: Europäisches Verbraucherzentrum


E-COMMERCE

Coche i cunfruntadëures de priejes online funziunea

I cunfruntadëures de priejes online ie n strumënt for plu adurvà per se giaté ora i miëur prudoc al miëur priesc. L utënt/La utënta possa crì ora tl cunfruntadëur l prudot per chël che l/la se nteressea y cunsulté na tabela cun i priejes de duc i shop online plu mpurtanc che l vënd. Ora che cunfrunté i priejes, pieta chisc cunfruntadëures for plu suvënz nce na lista tecnica ala menuda dl prudot, na culezion de rezenscions (sibe dai store nstësc sibe dala plates esternes spezialisedes) y per ultim, ma nia manco mpurtant, n servisc che ti va do ai priejes tl tëmp. Oradechël iel da lecurdé che nce la butëighes online nstësses à ublianzes prezises de trasparënza n cont di arbassamënc de priesc pitei. Da lugio 2023, defati, muessa i venditëures, te si campanies de promozion, mustré tlermënter ai/ala cunsumadëures l priesc che valova dant. Per "priesc da dant" iel minà l priesc plu bas che valova per i 30 dis dan l'aplicazion dl arbassamënt dl priesc. Per aprufondimënc cialëde la plata dla Zentrela Europeica Cunsumadëures (ZEC).


SUSTENIBLTÀ

L guant nia vendù ne daussa nia plu unì desdrù

La UE ie tl lëur de dé ora l Regulamënt nuef sun la progetazion ecocumpatibla di prudoc sustenibli. Danter l auter dij chësc regulamënt che l guant y i ciauzei nia vendui ne puderà tl daunì nia unì mé nsci desdrui. L ie preudù ezezions per la pitla mprejes y n tëmp de transizion per la mprejes mesanes. Cun l tëmp pudëssa chësta pruibizion unì slargeda ora nce a d’autra categuries de prudoc. Oradechël, n iede che l regulamënt nuef ie jit n forza, messerà i prudoc avëi n "passaport digitel dl prudot", na etichëta sun i prudoc che cuntenirà nfurmazions sun la sustenibltà dl prudot.


VIAGES

A cie mëter verda canche n prenutea n viac

Tl tëmp plu frëit dl ann iel bele chi che se semiëia la vacanzes spensieredes tl surëdl da d’instà. Purempò uel la Zentrela Europeica Cunsumadëures (ZEC) ti la cumëter a chi che uel jì de viac che l ie da abadé ai cosć scundui y a d’autri rëms che n possa ancunté canche n prenutea la vacanza semieda. Truepa persones nuza motores de crissa spezifics per hotiei y joi sun internet per po crì ora la ufierta che ie (ala semea) chëla plu a bon marcià o saurida. Ma, per solit, vëniel tlo mé relevà o cunfruntà i priejes de basa, ntan che l unirà po nce njuntà i cosć per i servijes n plu, sciche l cufer (da mëter sotite ma suvënz nce chël a man), la vela dla luegia da senté y d’autra tarifes defrëntes. Chësta spëises de njonta, coche nce la chertes de jol de basa, ie monce suvënz plu cëres sun la purteles de prenutazion che sun la plates web dla cumpanies de jol nstësses. Lijëde sun la plata dla ZEC a cie che n muessa mo abadé canche n prenutea n viac.

CAJE DL MËIS
Na cunsumadëura ova prenutà joi sun la plata web de n’agenzia de viac online spanuela: l jol de jita da Minca al Cairo y l jol de reviers da Hurghada a Minca. Cun desplajëi y marueia ne àla a Hurghada nia pudù zapé tl julier per julé de reviers ajache, se tratan de n jol charter, ne univa la cherta per l jol nia rateda valeivla. Per pudëi julé de reviers àla nsci messùz cumpré chertes de viac nueves. Nce la cunsulëntes dla ZEC Italia se à fat marueia a audì che la cunsumadëura ne à te chël cajo nia pudù zapé tl julier. Do na pitla nrescida iel pona unit ora che tl Egit vëniel aplicà na regula scialdi fetra: i joi charter fulestieres vën mé lascei pro sce i ie cuntenii te n pachet cumplet de unida y departida. Te chësc cajo particuler fova l jol de jita n jol de linia y l jol de reviers n jol charter. La ZEC Italia à mandà inant la retlamazion ala ZEC Spania, pervia che l’agenzia de viac ne n’ova nia nfurmà n cont de chësta limitazions y ëssa dassù vënder mé chëi joi che i/la passajieres pudova efetivamënter tò. Purtruep ne à l ntervënt dla ZEC nia abù suzes ajache l’agenzia de viac online se à parà contra uni respunsabltà dijan che la passajiera ova de si bona cris ora na compra cun opzion "multi-destinazion" y che la cundizions dla cumpania de jol fova unides mustredes su tres n link. A uni maniera desmostra chësc cajo che l ie mpurtant verifiché avisa i recuisic de ntreda te n Paesc dan prenuté n viac. Oradechël iel ala fin nce de mpurtanza lecurdé che prenuté tres agenzies online joi spartii possa datrai semië la soluzion plu saurida, ma l ne ie nia for na bona idea.