Verbrauchertelegramm Europa-Ausgabe Setëmber 2024

Beilage zur ladinischen Europa-Ausgabe Nr. 71 - Redaktion: Europäisches Verbraucherzentrum


VIAGES

La ZEC Talia pieta nfurmazions da pudëi avëi per pië via segures nce per cie che reverda la prutezion dla privacy

Canche n va n feries iel mpurtant no mé pensé al paussé y al divertimënt, ma nce ala prutezion de si privacy. Sce n sta te na strutura d’albierch coche te n hotel o na pension, iel de usanza che l ti vënie damandà l documënt d’identità al ghest. Chësta ublianza ie ududa danora dala lege te truep paejes per rejons de segurëza y tl respet dla normatives che ie n droa n cont dla registrazion di ghesć. La strutures d’albierch muessa nce garantì che i dac persunei di ghesć vënie tratei a na maniera segura y a una cun la leges sun la protezion di dac, coche l Regulamënt Generel sun la Prutezion di Dac (GDPR) per chël che reverda l’Europa. La/I cunsumadëures muessa unì nfurmei sun coche si dac persunei vën tratei y sun ciuni che ie si dërc. Pervia de chësc pieta la Zentrela Europeica Cunsumadëures Talia n valguna nfurmazions mpurtantes y cunsëies de utl.


LEGALISAZION

Turisć y turistes ne daussa nia cunsumé cannabis legalmënter tla Germania

La Zentrela Europeica Cunsumadëures Germania fej al savëi ai turisć/ala turistes che l’adurvanza dl cannabis resta contra la lege per la persones nia residëntes. Chi che à na residënza stabila tla Germania possa cultivé nchin a trëi plantes de cannabis per persona adulta a cësa y nce se scrì ite ai nsci tlamei “Cannabis social clubs” registrei y, oradechël, avëi pea nchin a 25 grams tl publich respetan n valguna restrizions. Danz vel chësc mé per la persones che à si residënza ufiziela tla Germania da almanco sies mënsc. Chësta cundizion stluj de cunseguënza automaticamënter ora i turisć/la turistes, persones imigredes da nuef per rejons de lëur y chi che studieia oradecà ntan si prim semester de residënza. Chësc uel dì che l resta inant contra la lege per i/la viagiadëures cumpré, avëi o cunsumé cannabis tla Germania. Per deplù nfurmazions.

TRAGHËC

De viac cun l auto eletrich tla Grecia

Da auril dl 2024 inant muessa i/la viagiadëures che va cun auti eletrics o ibrids tenì cont de regules nueves per l mbarch sun i traghëc tla Grecia. Per pudëi jì cun l auto sun l bastimënt muessa la patrì da ciarië di auti eletrics y ibrids avëi na cëria avanzeda medema o sot al 40% de si capazità plëina. Chi che avisa auti electrics y ulëssa tò n traghët per arjonjer la tierafërma greca o na ijula messerà mëter averda y se tenì a chësta regula nueva, scenó ne vëniel nia dat pro l mbarch. Lijëde sun la plata dla ZEC ciuni che ie i dërc de chi che viagia cun la berca tl’UE.


CAJE DL MËIS
De dezëmber dl 2023 à bera B. apustà online na tuta da pudejé da na firma austriaca. Do la avëi trata sëura per l prim iede se à l cunsumadëur ntendù che la tuta mustrova sënies evidënc de cunsum. L à riesc nfurmà la firma di defec tres na e-mail cun fotografies njuntedes. Sun dumanda dla firma à l cunsumadëur mandà de reviers l prudot da defet ala firma. Do n pue’ de tëmp à bera B. inò giapà de reviers la medema tuta da pudejé cun l’argumentazion che l se trata de cunsum mecanich y nia de n defet dl material. La cumedura o la sostituzion dla marcanzia ududa danora dala garanzia dla lege ie perchël unida negheda nsci coche nce la retuda dl priesc dla compra. Bera B. à nsci cuntatà tres telefon la Zentrela Europeica Cunsumadëures (ZEC) Talia. La ZEC Talia à cuntatà i coleghes dla ZEC Austria, che ie ntervenii cun suzes dal marcadënt austriach: bera B. à giapà de reviers la soma dla compra y à nchinamei pudù se tenì la tuta da pudejé.