Verbrauchertelegramm Europa-Ausgabe Jügn 2024

Beilage zur ladinischen Europa-Ausgabe Nr. 46 - Redaktion: Europäisches Verbraucherzentrum

EU

Scombatüda dl greenwashing

La diretiva nöia dl'UE 2024/825 é gnüda publicada dan da püch sön la Gazëta Ofiziala dl'UE. L‘obietif é chël da ti garantí ai consumadus y ales consumadësses na majera proteziun cuntra les pratiches comerziales ingianoses y renforzé la transiziun ecologica tres na miú informaziun.
Sön la "lista foscia" di comportamënc da araté pratiches comerziales dejonestes rovarál tosc danterater ince: l'amersciadöra di produc cun n sigil de sostignibilité nia basé sön n sistem de zertificaziun o che n'é nia gnü preodü da organisms statai;
la publicaziun de na detlaraziun ambientala generica (por ejëmpl "ecologich", "vërt", "sostignibl") che i comerzianc y les comerziantes ne sciafia nia da desmostré;
l'afermaziun che n produt ais na faziun neutrala, mëndra o positiva sön l'ambiënt por ci che reverda les emisciuns de gas cun faziun “ciasa de spidl”, canche chëstes emisciuns vëgn pordërt ma compensades.
Les regoles messará, n iade che ares é gnüdes tutes sö a livel nazional, gní aplicades pian ia dai 27.09.2026. Por savëi ci che la diretiva nöia prevëiga zënza ciamó, pón ciaré do sön le sit web dla Zentrala di Consumadus Europeica (ZCE): de plü informaziuns sön.


IMPRËSTÉ FORA AUTI

Sanziuns de indöt passa 18 miliuns a sis sozietés che imprësta auti

Sis impreses che imprësta fora auti che laora sön le marcé talian é gnüdes sanzionades dan da püch dal’Autorité Garanta dla Concorënza y dl Marcé (AGCM) por clausoles abusives. La clausola aratada ingianosa ti scriô dant a che che s'imprestâ fora n auto le paiamënt de na soma forfetara por spëises de gestiun, tl caje de multes dades por infraziuns stradales o n'avëi nia paié tarifes da parché o s’anuzé dl’autostrada tratan le tëmp dl imprëst. L’AGCM á araté che la soma ne foss nia iustificada, ajache le su ademplimënt damané te n te caje al'impresa che imprësta fora auti é chël da lascé alsavëi i dac dl cliënt/dla cliënta che â le veicul tl momënt dl‘infraziun. A pert le paiamënt de na sanziun aministrativa é les sozietés che imprësta fora auti gnüdes condanades a straiché la clausola dales condiziuns contratuales.

UE

Le gigant dl'e-commerce Shein vëgn aratada na VLOP

La Comisciun europeica á classifiché la botëga online Shein, che á passa 45 miliuns de utënzes tl'UE, sciöche na plataforma online da de gran dimenjiuns (Very Large Online Platform – VLOP) aladô dla lege sön i sorvisc digitai. L'aziënda messará porchël s'adaté ales desposiziuns plü sciodes dl Digital Services Act te cater mëisc dala notificaziun (en pratica cina la fin d'agost dl 2024); ara messará porchël surantó les mosöres spezifiches por responsabilisé y sconé i anuzadus y les anuzadësses online, cun lapró les porsones sot ai 18 agn, y valuté y smendrí sciöche al alda prighi sistemics eventuai che vëgn da sü sorvisc. De plü informaziuns é da ciafé sot.

CAJE DL MËIS
N consumadú talian á comané online da na sozieté todëscia döes chertes, por ci che al aratâ ester n conzert de n ciantarin american dër conesciü, por 60,45 euro por vigni cherta, che foss sté tla Germania de dezëmber dl 2023. Al consumadú y a süa compagna ti ál bindebó desplajü canche ai á odü sön paladina impede l’artist na cover band che ciantâ sü suzesc. Ajache al n’ê nia sté da capî che ara nen jô de n conzert de na cover band dales informaziuns sön le conzert, dales informaziuns sön les chertes o da so layout, ti á le consumadú ortié ala sozieté todëscia na reclamaziun. La reclamaziun n'é nia gnüda azetada ajache ara se tratâ do süa rata de n spetacul sön i suzesc dl ciantarin conesciü. Nia contënt dla resposta, á le consumadú contaté la Zentrala di Consumadus Europeica (ZCE) Talia, che á ortié inant la reclamaziun ala ZCE Germania che é antergnüda y á atira ciafé na soluziun y la sozieté ti á retü le cost de tramesdöes les chertes.