Verbrauchertelegramm Europa-Ausgabe Auri 2024

Beilage zur ladinischen Europa-Ausgabe Nr. 30 - Redaktion: Europäisches Verbraucherzentrum

COMERZ ELETRONICH

Le Digital Services Act vel por dötes les plataformes

Dai 17 de forá inant velel por dötes les plataformes online azessibles dal’Uniun Europeica les desposiziuns preodüdes dal Digital Services Act. Le regolamënt UE nü mira a fá a na moda che l'ambiënt digital sides plü sigü. L’obietif é chël da limité la difujiun de contignüs y marcianzia ilegai, aumenté la trasparënza dles informaziuns sön le reclam y limité chëra basada sön i dac sensibli. Implü ón scombate fenomens sciöche i discurs che impiza le sënn, la pedopornografia, la manipolaziun dl’informaziun y la zensöra online, le reclam ascognü o nia coret.
Liede sön le sit dla Zentrala di Consumadus Europeica (ZCE) cares che é les novités interessantes che influenzará diretamënter la vita di consumadus y dles consumadësses digitai.


COMERZ ELETRONICH

Dai 7 de merz velel ince les normes dl Digital Markets Act

Le Regolamënt (UE) 2022/1925 y le Regolamënt d'esecuziun (UE) 2023/814 stabilësc les regoles nöies por les gran plataformes digitales. Le insciödit Digital Markets Act (DMA) se crüzia da ciafé sö cares che é chëstes plataformes, chël ó dí cares che é les plataformes che i tolun vigni de tla maiú pert de nosta vita digitala, a chëres che al vëgn apliché les regoles nöies. Chëstes impreses vëgn designades sciöche “gatekeeper” y ne podará nia plü sfruté süa posiziun dominanta sön le marcé digital por promöie a na moda preferenziala sü produc impede chi de d'atri, scrí dant süa metoda de paiamënt sciöche sora poscibilité de paiamënt, adoré danü i dac personai coiüs adöm por n sorvisc por i fins de n ater sorvisc, ti scrí dant condiziuns nia respetoses ai utënc comerziai, instalé danfora certes aplicaziuns software, ti scrí dant limitaziuns ai utënc comerziai dles plataformes. Liede sön le sit dla ZCE cares che é les conseguënzes.

CAMPAGNA
<title3>I dërc di consumadus dl’UE al sorvisc di profugs dl'Ucraina</title<3>
La Campagna “I dërc di consumadus dl’UE al sorvisc di profugs dl'Ucraina ” é na scomenciadia dla Comisciun europeica te 6 Paisc dl’Uniun cun n gran flus de profugs: Talia, Germania, Polonia, Republica Ceca, Spagna y Bulgaria. I partner dla Campagna por la Talia é Adiconsum, che pita informaziuns sön i dërc di consumadus varënc tl’Uniun europeica, sciöche la garanzia legala, le dërt de retrata pro i contrac a destanza, les sconanzes preodüdes dala normativa sön i dërc di passajiers y i.i. - dërc che ti speta sambëgn ince ales porsones che á messü s'un sciampé dal'Ucraina porvia dla vera. Sön le sit Adiconsum él na seziun aposta cun informaziuns d'öga te 3 lingac: ucrain, talian y inglesc. Ince la ZCE é a desposiziun di profugs por pité informaziuns sön i dërc y l'assistënza tl caje de problems sura i confins fora.

CAJE DL MËIS
Na consumadëssa taliana â aposté n pachet turistich cun destinaziun Maroco por le mëis de setëmber 2023. Püc dis dan la partënza preodüda é le paisc baldi gnü atoché da n gran tremoroz. La consumadëssa â contaté le tour operator todësch, ajache ara orô desdí la vacanza porvia dla situaziun de emergënza. Do val' dis â le tour operator azeté da ti rete gran pert dl cost sot forma de voucher, se tignin indere le cost dl jore, ajache la compagnia de fligri low-cost n'â nia straiché le jore La normativa sön i pachec turistics prevëiga la poscibilité da se trá zoruch debann tl caje de situaziuns nia da schivé y straordinares tl post de destinaziun o atira dailó dlungia che á n influs negatif sön le iade o le trasport di passajiers tl post de destinaziun. Le jore fajô pert dl pachet y l'organisadú mëss sciöche responsabl de döt le pachet rete döt le prisc. Do l'intervënt dla ZCE Germania, a chëra che al ti é gnü ortié le caje, ti á le tour operator pité ala consumadëssa n voucher de döta la soma dl iade che ara á azeté.