Verbrauchertelegramm Europa-Ausgabe Nuvëmber 2024

Beilage zur ladinischen Europa-Ausgabe Nr. 87 - Redaktion: Europäisches Verbraucherzentrum

ABONAMËNC ONLINE

I consëis dla ZCE por schivé de burtes sorpreses

Tres de plü consumadus y consumadësses romagn blocá te abonamënc che vëgn tres indô renová zënza preavis, sovënz cun cosć plü alc sciöche naota preodü. La poscibilité da preodëi n renovamënt automatich n'é pordërt nia na clausola ilegitima, ince sce ara é da azeté espressamënter y spezificamënter (al pó tleché ince n clich!) y porchël él da mëte dër averda. I caji plü conesciüs pó revardé por ejëmpl, sorvisc de streaming, canche le tëmp de proa debann se trasformëia te n abonamënt al mëis a paiamënt, abonamënc a foliec y revistes digitai, olache les promoziuns iniziales ti fej lerch a tarifes altes por le renovamënt, abonamënc de software, sciöche programs por computer o app por smartphone, o ince cursc, plataformes o d'atri sorvisc online. Descuride co se stravardé cun i consëis dla Zentrala di Consumadus Europeica (ZCE) Talia.

Metede averda da ne gní nia ingianá!

La trapolada dl apartamënt en afit (massa) bunmarcé

Da agn ti vëgnel tres indô fat ala ZCE domandes da pert de consumadus y consumadësses che salta te anunzies de apartamënc en afit bunmarcé sön portai internet desvalis, che é baldi trapolades. Les fotografies dl apartamënt é dër beles, mo an ne pó nia jí a ti ciare al apartamënt, ajache le patrun é foradecá. Ci che salta tl edl é le prisc nia da bate y la tentaziun da paié ciamó demanco sce an paia n valgügn mëisc de afit danfora (miú ciamó döt l'ann). Te chisc caji messesson pordërt s'intëne che val’ ne vá nia, scenó perdon milesc de euro ajache l'apartamënt ne esist sambëgn nia. La Zentrala di Consumadus Europeica (ZCE) aconsiëia da ne paié nia danfora, sce an n'á nia odü debann y zënza impëgn l'apartamënt sön le post.

IADI

Novité por che che vá tl Rëgn Uní

Da canche le Rëgn Uní é jü demez dal’Uniun europeica, é i recuisic d'azes por turism mudá deplü iadi. Oramai ne se recordon prësc plü nia de canche al tlecâ la cherta d'identité por jí te chësc Paisc , sëgn adoron le passaport. Tosc messarán ince avëi n'autorisaziun eletronica por viajé, la insciödita ETA (Electronic Travel Authorisation). Al nen jará debojëgn dai 2 d'aurí dl 2025 inant y an podará damané do pian ia dai 5 de merz dl 2025 ma sön l’app aposta sön le sit dl Ministere dl Intern britanich por 10 sterlines. De plü informaziuns ciafëise chiló.

CAJE DL MËIS
N consumadú bulgar â comané n per de manëces dal palé por so möt da na botëga online taliana. Le sogadú jonn ê dër desplajü canche al s'â intenü da les tó fora che les manëces â n defet. Do che la botëga online n'â nia respognü ales reclamaziuns dl consumadú, âl contaté zënza pisimé la Zentrala di Consumadus Europeica (ZCE) Bulgaria, che â damané la ZCE Talia da antergní por ciafé na soluziun.
La consulënta legala dla ZCE Talia â contaté la botëga damanan süa colaboraziun y â atira ciafé na resposta dal comerziant online, che â dit che al ti savô demorvëia da ne avëi nia ciafé denant na reclamaziun y â garantí che an s’ess atira cruzié dla chestiun. Ala fin éson gnüs lassura che la misciun e-mail adorada dal consumadú por la reclamaziun ê falada, che an n'â nia ciafé la reclamaziun y che ara n'ê porchël nia gnüda tuta en conscideraziun.
Ciamó n iade é n caje gnü stlüt jö bun y le personal de consulënza dla ZCE Talia á constaté (nia por le pröm iade) che do da val' problems él ma na malintenüda por chëra che ara vá da ciafé saurí na soluziun.